“Ita iha númeru 25 mill reklamantes ne'ebé iha, e husi 25 mill ne'e, besik 20 mill ida iha Dili, restu mak iha Ermera ho Munisípiu sira seluk. Ida ne'e, mak importante, atu halo hela, koordena hela ho ministériu implementadór sira, e ha'u husu atu ministériu implementadór sira atu sériu rezolve pendente sira, dentru iha fulan-agostu nia laran”, dehan Ministru Joaquim, iha salaun City 8 iha Canossa Has-laran, Manleuana, tersa (17/08).

Iha programa rekuperasaun ekonómia, liuhusi ai-hán sesta bázika, Governu kontrata kompaña nasionál sira hamutuk atusrua-resin (200-resin).

Maibé, kuaze pursentu 70 (70%) mak Governu halo ona pagamentu no dadaun ne'e prosesu la'o hela ho montante osan hamutuk dollár Amerikanu rihun-60 (US$60 mill), mak uza hodi selu ba kompaña fornesedór sira ho pursentu 80 (80%).

Maske, kompaña sira sei iha problema kona-ba administrasaun ninian liliu liga ho dokumentu sira husi kompaña sira rasik, maibé, Governu nafatin prosesa dadauk ona pagamentu ba sira.

Husu ba ministériu implementadór ho kompaña fornesedór sesta bázika atu buka solusaun lalais ba dadus reklamante sira, nune'e iha fulan-agustu ne'e bele aselera ona distribuisaun filafali ba populasaun sira ne'ebé halo reklamasaun.

“Ida ne'e dala-ida tan ha'u husu ministériu implementadór sira atu tau atensaun sériu atu bele rezolve, halo pagamentu ba iha benefisiáriu sira ne'ebé seidauk simu, e osan ba ida ne'e iha, tanba ne'e maka ha'u ohin hein katak bele aselera atu selu iha fulan-agustu”, deklara nia. (*)