Husu atu estuda no buka téknika hodi kuda fali ai-seluk, troka ai-santuku tanba dadaun ne’e kuaze ai-samtuku mate hotu no fó impaktu tebes ba kafé.

“Ami  husu ba Ministru se bele favór ida,  hanoin netik kona-ba kafé, tanba ai-samtuku iha Ermera ne'e, kuaze mate hotu, ne'e mak ami husu ba tékniku sira hanoin kona-ba kafé tanba ami-nia rain ida Ermera ne'e moris ho kafé”, dehan nia hafoin partisipa iha seremónia lansamentu produtu lokál iha Kolmera, tersa (15/06).

Bainhira iha munisípiu Ermera mak kafé lakon, iha mós aikon sira hanesan rikusoin no identidade nasaun nia mós lakon.

“Ami husu ba Ministru hanesan mós viziño Ermeraoan, entaun ami husu atu estuda tok ida ne'eba, saida mak bele troka fali ai-santuku, atu kafé bele iha fali no ami-nia aikon ida Ermera ne'e la bele lakon”, afirma nia.

Hatan ba preokupasaun ne'e, Ministru Agrikultura Peskas (MAP), Pedro Reis hatete, kafé ne'e uluk kedan sai identidade Timor-Leste nian no iha ukun-an mosu tan produtu sira seluk.

“Realidade ne'ebé mak agora ai-santuku ne'ebé mosu ona moras ida ne'ebé mesak mate de'it, maibé ida-ne'e Ministériu  la hela nonok, iha diresaun tékniku, diresaun floresta nian ami sei buka rezolve maizoumenus ai saida mak iha hodi troka fali ai-santuku, nune'e bele hamoris hikas no kafé labele mate”, dehan nia.

Ddaun ne'e, Ministériu Agrikultura e Peskas (MAP) prosesu la'o hela no buka hela meius hodi rezolve ai-santuku iha Ermera. (*)