Ministru ne’e hateten, kona-ba CCI-TL governu atu halo alterasaun ba lei balun hodi hakbi'it mós seitór privádu sira, nia rekoñese durante ne'e seitór privádu sira iha barreiras balun ne'ebé presiza atu halo armonizasaun, governu sei haree atu oinsá akomoda preokupasaun sira ne'ebé prezidente CCI-TL aprezenta.

“Governu toma nota, no sei buka dalan oinsá bele hetan solusaun, konserteza sei la dala-ida, maibé tuir posibilidade sei buka tenta atu bele fó gradualmente. 2021 maka governu sei tau osan barak liu iha seitór infra-estrutura, tanba ne’e maka ohin iha mós MOP fó ninia intervensaun enkoraja seitór privádu sira atu bele prepara aan di'ak liu tan”, MKAE hateten.

Nia hatutan, preparasaun atu iha sentidu dimensaun ida luan, la'os de'it kontentes, maibé prepara aan iha área lubuk ida hanesan iha área jestaun finanseira nian hodi fásilmente bele asesu ba iha kréditu sira nune'e finansia ba iha projetu ka programa hirak ne'ebé seitór privádu sira hetan kontratu husi governu.

Antes ne’e, Prezidente Cámara Comerçio Indústria Timor-Leste (CCI-TL), Oscar Lima husu ba governu atu altera lei balun hodi bele fó benefísiu ba seitór públiku no privádu nasionál sira atu bele halo investimentu ho di'ak. (*)

Publisidade