Antes ne’e, Prezidente Repúblika, José Ramos-Horta hala’o ona vizita servisu ba Indonézia iha fulan-Jullu 2022 hasoru malu ho Prezidente Repúblika Indonézia, Joko Widodo hodi asina ona akordu kooperasaun zona ekonomia livre entre fronteira rua.
Tanba akordu kooperasaun ne’e rai rua halo hodi ajuda dezenvolve ekonomia povu rai rua sira iha liña fronteira terrestre.
“Ami diskute mós kona-ba zona ekonomia fronteira ida-ne’e sei implementa lalais husi ekipa Indonézia nomós Timor-Leste sei hala’o hela preparasaun. Ekipa rua ne’e mós sei hasoru malu hodi diskute konseitu ne’ebé iha konkordansia ba malu”, informa Embaixadór Okto Dorinus hafoin hala’o enkontru ho Primeiru-Ministru Xanana iha Palásiu Governu, segunda (14/08/2023).
Governu Indonézia prontu servisu hamutuk ho IX Governu Konstitisionál lideradu Kay Rala Xanana Gusmão ho membru governu na’in 46 inklui primeir-ministru ne’ebé simu pose husi Prezidente Repúblika, José Ramos-Horta iha loron 01 Juñu 2023.
“Ohin mai hasoru Primeiru-Ministru Xanana hodi aproveita kumprimenta, no ami diskute kona-ba preparasaun servisu hamutuk entre Timor-Leste no Indonézia hodi kontinua diskute kooperasaun bilaterál ho governu foun ne’e”, hatete nia.
Ekipa tékniku Indonézia no Timor-Leste mós sei kontinua diskute atu hakotu fronteira terrestre rai rua iha tinan 2023 nia laran.
Antes ne’e, Eis Primeiru-Ministru, Taur Matan Ruak halo ona vizita ba Indonézia hodi diskute kooperasaun servisu implementa zona ekonomia livre. (*)