Nune’e, Governu Timor-Leste sei introduz uzu kartaun ba Kréditu ba titulares no membru órgaun soberania sira.
Tuir informasaun ne'ebé www.tempotimor.com asesu iha pájina Ministériu Finansas (MF), kinta (26/01) katak, Prezidente Repúblika, José Ramos-Horta promulga ona Dekretu Lei númeru 1/2023, 25 Janeiru kona-ba Ezekusaun Orsamentu Jerál Estadu (OJE) tinan 2023.
Diploma ne’ebé aprezenta husi Ministru Finansas, Rui Gomes ba iha Konsellu Ministrus iha 11 Janeiru liubá ho objetivu atu estabelese regras kona-ba ezekusaun orsamentál hodi fasilita ezekusaun OJE 2023.
Oitavu Governu Konstitusionál introdus dibploma ne’e, ba dahuluk uzu Kartaun Débitu no Kartaun Kréditu ne’ebé Titulares no Membrus Órgaun Soberania, Titulares Órgaun Diresaun no Titulares Kargu Diresaun bele uza hodi halo pagamentu bens no servisus liuhusi plataforma online.
Introdus mós ba dahuluk programa pílotu Dezentralizasaun Funsaun Pagamentu Tezouru (Back Office) 100% ba iha Liñas Ministeriais selesionadu hamutuk 13 inklui Prezidénsia da Repúblika, Parlamentu Nasionál, Primeiru Ministru, Ministériu Finansas, Ministériu Negósius Estranjeirus no Kooperasaun no seluk tan.
Entidades Estadu selesionadu hirak ne’e hetan autonomia kompletu hodi ezekuta rasik sira-nia orsamentu hahú husi inísiu to’o realizasaun pagamentu bens no servisus.
Governu hahú halo melloramentu neine’ik, maibé beibeik, ho objetivu atu uza rekursu finanseiru ho di’ak, ho kualidade no efisiente ba bem-estar povu nian.
Recorda iha tinan 2017, Sestu Governu Konstitusionál hahú desentraliza Funsaun Pagamentu Tezouru 100% ba iha Ajénsias Autonomas no Autoridades Munisipais, enkuantu ba Liñas Ministeriais 75%.
Polítika ne’e aliña ho Polítika Reforma Fiskál no Jestaun Finanseira Públikas ne’ebé mak introdus ona desde tinan 2015 husi Kintu Governu Konstitusionál no haree ba ninia importansia, Oitavu Governu Konstitusionál komprometidu atu kontinua implementa.
Antes ne’e, iha loron 5 fulan-janeiru, Ministru Rui Gomes mós halo ona abertura ofisiál ba sistema Government Resource Planning (GRP) ka FreeBalance hodi marka inísiu ezekusaun OJE 2023 no simbolikamente Entrega Pakote OJE 2023 ba reprezentantes Gabinete Prezidénsia Repúblika, Gabinete Prezidente Parlamentu Nasionál, Gabinete Primeiru Ministru, Gabinete Prezidente Tribunál Rekursus nomós ba Liñas Ministeriais. (*)
