Maibé SEAK, Teófilo Caldas hatete, orasamentu ne’ebé preve ba fulan 6 de’it, tanba mandatu ba Governu daualu hela fulan 6, nune’e ekipa sei ba tereñu halo verifikasaun ba konstrusaun uma-lulik hafoin fila mai halo kontratu hodi fo ajuda ba sira.
"Governu nia mandatu hela fulan neen (6) de'it ona, orsamentu ba apoiu komunidade konstrui uma-lulik no grupu kulturál, ami tau de'it US$100 mill, ne'e atu apoiu iha fulan fevereiru to'o juñu, bainhira foun mai bele propoin orsamentu ratifikativu", dehan nia hafoin sorumutu ho Primeiru Ministru iha palasiu governu, kinta (19/01).
Tinan 2022, proposta ne’ebé komunidade sira submete mai, apoiu grupu kulturál iha 80 no konstrusaun uma-lulik 180, maibé balun husu osan to’o rihun US$5, ne'e governu presiza osan boot.
Nune’e SEAK, Teófilo Caldas ohin kinta (19/01) informa ona ba Primeiru Ministru, Taur Matan Ruak, kona-ba atu implementa programa tinan 2023 nian.
"Liuliu servisu 2023 ninian, ami iha programa ida mak kultura patrimoniu, sub-programa mak tolu no atividade sira seluk, ida ne'e mak ha'u informa ba exlensia Primeiru Ministru", nia haktuir.
Maibé atu implementa, presiza rekolla lai relatoriu kona-ba orsamentu ne’ebé iha tinan 2022 apoiu ona ba komunidade sira hodi utiliza ba konstrusaun uma-lulik no atividade grupu kulturál nian. (*)
