Print this page

Governu Aprova Projetu Proposta Lei OJE ba Tinan 2023

Reuniaun Konsellu Ministru sira iha Palasiu Governu. Reuniaun Konsellu Ministru sira iha Palasiu Governu. Foto Suplay

Tempotimor (Dili)-Governu liuhusi konsellu Ministru(KM) aprova ona Projetu Proposta Lei Orsamentu Jerál Estadu (OJE) ba tinan 2023, ne’ebé aprezenta husi Ministru Finansas, Rui Augusto Gomes.

“Reseita sira Setór Públiku Administrativu nian hanesan US $3.156.922.141, no despeza Setór Públiku Administrativu nian hanesan US $3.155.715.306, inklui Fundu Kombatente Libertasaun Nasionál no orsamentu sira Seguransa Sosiál nian no ba Rejiaun Administrativa Espesiál Oekussi Ambeno (RAEOA)”, dehan Ministru Prezidénsia Konsellu Ministru, Fidelis Leite Magalhães iha Palásiu Governu, kuarta (14/09).

Nune'e despeza sira ba servisu no entidade Administrasaun Sentrál ho valór dolar amerikanu millaun rihun 2,8. Despeza sira ne’ebé prevee ba Seguransa Sosiál ho valór dolar amerikanu millaun 235,7 no Rejiaun Administrativa Espesiál Oekussi Ambenu (RAEOA) ho montante dolar amerikanu millaun 120.

Iha ne’e sei la inklui orsamentu ne’ebé prevee ba Fundu Kombatente Libertasaun  Nasionál, 33% husi orsamentu sei aloka ba kuadru institusionál, 35% ba kapitál sosiál, 11% ba dezenvolvimentu ekonómiku, 18 % ba dezenvolvimentu infraestrutura no 3% ba fundu kontinjénsia.

Projetu ba Proposta Lei ne’e prevee alterasaun balun iha taxa impostu seletivu ba konsumu nian, kompara ho saida ne’ebé define iha OJE tinan 2022 nian, liuliu: Masin-midar no produtu konfeitaria ba oin sei iha taxa impostu dolar amerikanu 1 ba kilograma ida; Bee kahur ho masin-midar ka edulkorante ka aroma seluk, no bebida sira la ho alcohol, la inklui sumu ai-fuan ka produtu ortíkola ba oin sei iha taxa impostu dolar amerikanu 3 ba litru ida.

Valór taxa impostu atu aplika ba tabaku no produtu seluk mai husi tabaku, ba oin sai husi dolar amerikanu 50 kada kilograma ba dolar amerikanu 100 kada kilograma.

Karreta sira ho ninia valór aas liu duké dolar amerikanu rihun 10 ba oin sei iha taxa impostu porsentu 10, karreta sira ne’ebé ho ninia valór aas liu dolar amerikanu rihun 25 ba oin sei iha taxa impostu porsentu 25, no karreta sira ne’ebé ho ninia valór aas liu duké dolar amerikanu rihun 50 sei iha taxa impostu porsentu 30. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items