“Prosesu ne'e la'o hela, bainhira aviaun mai foti sira mak ita ko'alia barak. Servisu iha área ospitalidade liliu iha buat sira seluk tan mais ospitalidade ne'e mak primeiru”, dehan nia hafoin finaliza audénsia ho Prezidente Repúblika, José Ramos Horta iha Palásiu Prezidensial Bairo Pite, segunda (22/08).
Ba Kompromisu ida-ne'e, mak Embaixadór Timor-Leste ho Ekipa delegasaun husi Estadu Brunei (Zamancartel Berhad Group Manpower Agency) hasoru malu ho Xefe Estadu hodi atualiza kona-ba prosesu atu lori Timoroan sira ba servisu iha Brunei.
“Ohin ami mai hasoru malu ho sua eselénsia Prezidente, ko'alia kona-ba delegasaun husi Brunei-Darsulam ne'ebé mai atu haree kona-ba oinsá mak ita-nia oan sira bele ba servisu iha Brunei”, esplika nia.
Dadauk Estadu Brunei iha hanoin atu simu traballador ba servisu ne'e presiza ema na'in hira ne'e sei iha prosesu hela maibé felismente ema ne'ebé sai ne'e tenke asina kontratu mak sai.
Tanba nasaun sira iha Ásia ne'ebé foin dahuluk atu simu Traballadór Timoroan mak Brunei tanba ne'e ba atu hakat ba servisu iha nasaun Ásia, ne'e presiza tetu didi'ak.
“Ne'ebé ita sei tetu halo didi'ak, para sasán hotu la'o di'ak, ne'ebé ajénsia sira-ne'ebe lori ita-nia ema ba, tenke kuidadu sira to'o sira ba ne'ebá tinan rua, filafali mai, laiha problema”, hatete nia.
Durante iha audénsia, Prezidente Repúblika, José Ramos Horta sente kontente tebes, no Xefe Estadu mak sei fó liafuan ba média sira kona-ba pozisaun Xefe Estadu nian. (*)