"Kona-ba notísia ne'ebé públika iha média sosiál, relasiona implementa UKL iha Suku Ossohuna Postu Baguia nian informasaun fó sai familiarista, maibé ami garante ne'e la akontese," dehan Amelia iha kna'ar fatin, vila nova Baukau, sesta (01/04).
Tanba, verifikasaun atu hetan UKL husi Governu, Suku mak deside benefisiáriu husi Aldeia alvu, hafoin ékipa indepedente kompostu husi na'in-8 halo verifikasaun kle’an.
Ékipa verifikasaun, kompostu husi Xefe Suku, Xefe Aldeia alvu, veteranu, Ofisiál Polísiamentu Suku (OPS), juventude, reprezentante feto no PNDS husi Munísipiu no Postu, tanba ne’e, konsidera informasaun ne'ebé lansa iha públiku falsu.
"Ema hotu iha direitu halo opiniaun, maibé komunidade ne'ebé seidauk hatene prosesu uma kbi'it la'ek karik, bele hakbesik aan ba suku bainhira iha sosializasaun," nia hatete
Alende ne’e, iha mós informasaun ne'ebé espalla katak, besi ba UKL laiha kualidade no latuir BQ, maibé ne’e lalos, tanba besi kanal C ba UKL faze daruak modelu hanesan ho faze primeiru tinan-2021.
"Matérial espesifiku ou uza ba matérial fabrikadu hanesan tuir standar ne'ebé iha, tanba antes ita implementa halo ona peskiza lubuk ida ba ida ne'ebé iha área rurál, iha fatin anin, oinsá baza tahan iha ne'eba, entaun buat hotu tuir point standar ne'ebé implementa iha teritóriu laran, point ida deit," nia afirma
Informasaun seluk katak, tula fatuk, hatun kalen iha dalan boot atu lalin ékipa PNDS haruka benefisiáriu mak selu rasik, ne’e lalos.
"Ami komfirma direita ho suku, fatuk ne'e ema benefisiáriu mak halibur, kona-ba pagamentu nia la aseita atu selu, tanba nia hakarak osan ne'e rai hela to’o uma hotu atu hola sasan priense ba uma ne'e rasik, la'os la selu maibé benefisiáriu mak kontribui nia hakarka osan restu," nia akresenta
Nune'e, Xefe Suku Oso-huna Baguia, Jacinto Soares Guterres afirma, UKL ba tinan kotuk kompostu uma tolu iha Aldeia Uaikadae, durante prosesu konstruksaun la'o di'ak, maibé tarde oituan, tanba tempu udan atu transporta matérial susar.
"Komunidade lalin duni raihenek, maibé la'os sira mak selu, ne'e na'in rasik mak lalin, no besi mós iha kualidade, tanba estadu haruka mai ne'e tenke iha kualidade," nia hatete
Xefe suku mós rezeita informasaun ne’e, tanba dadaun konstrusaun ba uma UKL tolu kontinua la'o di’ak uma rua taka ona kalen no halo ona reboka, ida seluk badae kontinua servisu. (*)