Xefe Aldeia Basar-uai (Hae-coni), José Pereira Guterres haktuir, dezastre naturál ne'e akontese purvolta tuku 09:00 dader, ai-hun tohar hodi hanehan komunidade nian kios, maibé la rezulta ema ruma hetan kanek.

"Ai ohin dader tohar hanehan ha'u nia komunidade nia kios, sasan kios nian mak labele salva, tanba ai hanehan estragus totál inklui fiu eletresidade iha Suku Hae-coni, sasan labele lori sai, tanba ai hanehan, iha laran hanesan supermi, kafe no sasan seluk sira, vitíma la iha kios laran nia toba hela fali uma,” dehan nia ba www.tempotimor.com via telefone, kuarta (23/02).

Alende ai-hun boot tohar hanehan komunidade nian kios, taka mós estrada nune'e difikulta movimentu transporte públiku husi suku Afaloikai ba Postu Baguia no ba Baukau Vila.

Tanba ne'e, husu urjente ba parte relevante atu haree no resolve kios no fiu eletrisidade ne’ebé estragus husi udan no anin.

Enkuantu kios ne'ebé hetan estragus pertense ba João dos Reis idade 62, iha Aldeia Basar-uai, Suku Hae-coni, Postu Baguia.

Nune'e mós, komunidade, Abrão Freitas hatete, fiu eletrisidade ne'ebé hetan estragus husi udan no anin boot, dadaun komunidade husi Suku tolu labele asesu eletrisidade.

"Ai-hali hun ne'e tohar iha Aldeia Basar-uai, Suku Hae-coni nian, Suku Hae-coni Afaloikai no Osso Huna, dadaun listrik mate, ai hun ne'e mós seidauk tesi, karreta liu ladi'ak motor mak bele liu," nia argumenta

Komunidade ne'e, husu ba parte EDTL.ep no Bombeiru Baukau atu normaliza lalais dalan no eletrisidade ne'ebé hetan estragus.

Abrão informa, udan no anin iha Suku Hae-coni kontinua makas fó ameasa ba komunidade sira nia hela fatin ne'ebé besik iha ai-hun boot.

To'o notisia ne'e públika, www.tempotimor.com tenta konfirma Xefe Suku Hae-coni liuhusi via telefone, maibé númeru mate hela. (*)