“Sim Komandu iha ona planu operasaun, tanba ita hatene katak estudante sira iha kapitál Dili ne'e, bainhira rona rezultadu sira kontente demais hodi haluha mós sira-nia vida, entaun sira halo pawai, uza kanu restu, la uza helem no balun laiha dokumentu, tanba ne'e ita iha ona planu operasaun ba ida ne'e”, dehan Komandante Tránzitu Munisípiu Dili, Inspetór Domingos Sarmento Gama, iha komandu munisípiu Dili, tersa (18/01).
Tanba ne'e, husu ba estudante Finalista sira, keta kontente ho rezultadu ezame nasionál hodi halo pawai iha sidade Dili, tanba polísia tránzitu Dili kolokadu hotu ona iha fatifatin atu asegura.
Entretantu Polísia Tránzitu Dili sei la halo operasaun mesak maibé sei envolve mós Unidade Espesiál Polísia (UEP), Tránzitu Nasionál, Servisu Informasaun Polísia (SIP), Unidade Polísia Marítima (UPM) no Unidade Patrullamentu Fronteira (UPF) hodi asegura situasaun wainhira nesesáriu.
Aleinde ne'e PNTL mós identifika ona eskola ne’ebé rísku bá konflitu hodi koloka ona membru sira iha área hanesan, Postu Administrativu sira, nune’e bainhira mosu problema ruma, Polísia bele atua lalais. (*)