Rezultadu votasaun pezár ne’e hetan votu a-favór husi deputadu hamutuk 47, no deputadu na'in-18 aujenta (la partisipa) iha plenária.

“Ho ida ne'e meza anunsia, votu pezar ba Koronel Infantaria Domingos da Costa Domin ne’e aprovadu”, dehan Prezidente Parlamentu Nasionál (PN), Aniceto Longuinhos Guterres Lopes, iha plenária, tersa (30/11).

Deputadu Bankada PD, António da Conceição hatete, maske matebian Domingos Santos Domin hakotu ona nia peregrinasaun iha mundu maibé nia istória no kontribuisaun luta ba libertasaun sei rai metin iha Timor-Leste.

Tanba saudozu Domin partisipa luta maske ho idade nurak hela maibé nia hola desizaun vizionáriu responsabilidade hakarak atu hamutuk ho FALINTL reforsa funu ba ukun rasik-an.

Tanba ne'e, Bandaka PD fó nia hakruuk tanba lakon nia responsabilidade ida, ne’ebé atu kontinua luta no kontribui ba luta ukun rasik-an ninia, ne’ebé asume kargu aas liu iha Partidu Demokrátika nian iha munisípiu Covalima.

Pozisaun PD la haluha no nafatin rekuñese saudozu nia kontribuisaun haboot partidu iha Covalima iha inisíu tempu ukun rasik-an, no rekuiñese éroi ho tinan ne’ebé nurak hola ona responsabilidade atu reforsa funu ba ukun rasik-an.

“Isin mak lakon maibé obra sei hakerek nafatin ho letra boot iha livru istória luta libertasaun nasionál. Nune’e, estrutura partidu hato’o sentidu profundu lutu”, dehan nia.

Koronel Infantaria, Domingos da Costa ‘Domin’, dedika vida tomak ba libertasaun nasionál, envolve atividade klandestina, guerrilla iha luta libertasaun no hahú iha 2001, integra iha Falintil-Forsa Defeza Timor-Leste iha dezenpeña funsaun ho lealdade servi instituisaun.

Enkuantu, iha ne'e, Parlamentu Nasionál mós aprova votu pezar ba saudozu Álbaro do Nacimento ‘Sesurai’, nu’udar kuadru ida ne’ebé hola parte frente klandestina iha rejiaun kuatru dezde re-organiza ho saudozu Nino Koni Santana iha rejiaun hoksolok sempre iha estrutura re-organizasaun hamrik nu’udar sektretáriu Suai nian to’o funu ramata.

Saudozu Álbaro do Nacimento ‘Sesuarai’ ho idade (56), moris iha Zumalai, Covalima, loron 06 maiu 1965 no hakotu iis iha loron 16 novembru 2021 iha HNGV tanba moras komplikadu.

Kontribuisaun saudozu nian ho idade sei joven bainhira Indonézia invade territóriu, halo servisu apoiu atividade klandestina iha Dili no ligasaun munisípiu sira-ne’ebé nunka deziste.

Iha tinan 1989 saudozu Sesurai hetan kapturasaun no torturasaun hosi militár Indonézia, no tinan 2009 saudozu nu’udar deputadu durante tinan ida ho balun  husi bankada Partidu Demokrátiku. (*)