“Ami husi konfiderasaun desportu Timor-Leste mai hasoru sua eselénsia PR hato'o papel CDTL ba señor Prezidente atu akompaña prosesu tomak ne'ebé mak la'o iha rai laran hamutuk ho federasaun desportiva 35 afilia ba konfederasaun Desportu Timor-Leste. E apoiu ne'ebé mak ita husu ba Xefe Estadu oinsá bele nafatin dezenvolve Desportu hanesan iha primeiru mandatu”, dehan nia hafoin audénsia ho PR Horta iha Palásiu Prezidensiál, Bairo Pite, kuarta (22/06).

Tanba dadauk iha atividade balun ne'ebé CDTL hala'o no buka mós apoiu husi parte balun, ne'ebé bele sai patrisionadu ba atividade desportu iha Timor-Leste, ida-ne'e Papel CDTL nian atu haree prosesu hirak ne'e oinsá mak dezenvolvimentu federasaun desportiva ne'e la’o di'ak.

“Iha neste momentu iha 35 federasaun sira ne'ebé afilia ba CDTL, husi ida-ne'e ita-nia ekipa halo hela diagnostika ida ba funsionamentu administrasaun mais ho operasionál hotu iha 35 federasaun desportiva ne'ebé mak afiliadu”, afirma nia.

Ba kestaun ne'e, Prezidente Republika, José Ramos Horta, promete sei nafatin kolabora ho CDTL, nomós entidade governativa atubele dezenvolve Desportu Timor-Leste iha futuru. (*)