Xefe Suku Uaigae, Marcos Pereira Soares informa, bainhira dalan ne'e monu difikulta movimentu transporte husi postu ba Suku Uaigae rasik inklui mós Suku seluk ne'ebé mak baliza ho Suku refere.

"Ne'e akontese iha loron 08 fulan-dezembru tinan kotuk tanba udan, dalan ne'e monu agora ami liu ladi’ak preukupasaun boot ba komunidade suku Uaigae tomak, nune'e mós dalan ne'e komunidade husi Suku balun mós asesu”, informa Marcos ba jornalista www.tempotimor.com iha Baukau, tersa (04/01).

Nune'e obriga komunidade sira foti dalan alternativu liuhusi mota laran, bainhira tempu udan, transporte sira hanesan karreta no motorizada tenke para hein to’o mota tuun ho debitu kiik hafoin bele hakur.

"Iha mota-oan ne'e mós monu sa'e ba foho lolon ne'e mós monu, ne'e preukupasaun boot ba komunidade kuaze suku-9 asesu hanesan Uaihareboho, Uaimori tomak preukupa duni, tanba kuaze suku Bemori, Vemase inklui mós komunidade Ossouala, Loilubu balun liuhusi iha ne'e”, deklara nia.

Ho akontesimentu ne’e, autoridade lokál hato'o ona proposta liuhusi diresaun servisu obras públiku Munisípiu Baukau ba Nasionál, maibé seidauk iha resposta.

Nune'e, komunidade Jeovaldo Carvalho Soares sente triste, tanba dalan refere hetan estragu husi udan no difikulta movimentu transporte atu tula sai komunidade nia produto ba merkadu.

"Hanesan komunidade sujere se bele hadi’a netik estrada ne’ebé estragu husi dezastre, kria mós aktividade hanesan reflorestasaun iha suku Uaegae, liliu parte ne'e bele asegura bee, foho lolon atubele asegura inundasaun iha tempu udan”, dehan nia.

Ba informasaun ne’e, jornalista www.tempotimor.com tenta konfirma Diretór Servisu Obras Públiku Munisípiu Baukau, maibé laiha fatin. (*)