Tuir informasaun ne'ebé www.tempotimor.com asesu liuhusi Pesoál Ekipa Sekreta ne’ebé lá kohi publika nia identidade informa, kona-ba kronolojia husi kazu ne'e mak, antes ne’e suspeitu sira iha planu ona hodi halo grupu rua hodi fahe, balun hein iha dalan diresaun Igreja Katedral sa’e ba Tuana Laran iha Aldeia Virgoloza, Suku-Vila Verde, Postu-Administrativu Vera Cruz, Munisípiu Dili.
Nune'e iha oras tuku 4:00 madrugada membru husi GAM PSHT remata atividade simu graduasaun atu fila ba ida-idak nia uma to’o iha dalan iha fatin akontesimentu hetan kedas asaltu husi suspeitu ho nia maluk sira hodi fatuk mak tuda inklui lori mós samurai ida hodi rezulta vítima na’in 5 kanek.
Vítima na’in-lima ne'e kompostu husi mane na’in-3 ho feto na’in-2 husi GAM PSHT ne'ebé hetan kanek grave iha parte ulun kanek no kuak rezulta rán sai maka’as no agora dadauk vítima sira hala’o ona tratamentu iha Hospital Nasional Guido Valadares (HNGV).
Suspeitu antes ne’e komete ona kazu Furto/na’ok iha área kapitál Dili no asalta malu iha kapitál Dili no ekipa servisu kaptura tiha entrega ba Eskuadra PNTL Dom-Aleixo, maibé ikus mai suspeitu hetan Termu Identidade Rezidénsia(TIR) kada semana.
Depois kaptura suspeitu deklara katak nia ho nia kolega sira hamutuk na’in-8 seluk ne'ebé mak halo asaltu ba Membru GAM PSHT to’o hetan Grave.
Dadaun ekipa konjuntu kontinua buka suspeitu sira seluk ne’ebé mak sei halai Subar. Entretantu ekipa konjunta kaptura autór AJG, tinan 20 ne'e iha oras 11:00 dader, sesta (19/08) hela iha Matadoro, Suku Vila-Verde. (*)