“Atu informa katak, foin daudaun, ita-nia membru Servisu Sekreta husi Komandu UPF ho SNI, halo vizilánsia hamutuk iha fronteira konsege hetan komunidade balu tenta hatama atributu Grupu Arte Marsiál ne’ebé parténsia Grupu Persaudaraan Setia Hati Terate (PSHT), tuir dalan ilegál iha Suku Batugade, Postu Administrativu Balibo, Munisípiu Bobonaro”, dehan Komandante UPF, Superintendente Euclides Belo, liuhusi telefone, kuarta (13/07).
Operasaun ne’e ekipa konjunta la konsege kaptura autór tanba sira konsege halai no soe hela sasán sira ne’e iha mota laran maibé sira sei esforsa an halo servisu estraordinária iha liña fronteira hodi buka tuir suspeitu sira ne’e.
“Sira halai soe hela saku boot 1, plastik boot rua 2, pasta 1, farda treinu PSHT pares 52, sabuk hena mutin 20, faru PSHT kór mutin 1, kór metan 4, pasta ki’ik hamutuk 14 no atributu hirak ne’e ita asegura ona iha Kuartel UPF, Fatuk Boot, Batugade”, esplika nia.
Nune'e UPF husu atu Komunidade nafatin servisu hamutuk ho sira, tanba fronteiras terrestre hanesan fatin ne’ebé mak luan no presiza apoiu husi komunidade, nune’e bele halo kapturasaun ba ema sira ne’ebé mak tama sai ilegál.
“Ita nafatin servisu hamutuk ho komunidade iha liña fronteira, faktu hatudu katak informasaun hotu ne’ebé iha mai husi komunidade ne’ebé iha ona konsiénsia nasionalizmu, hatene sentidu estadu mak pasa imformasaun ba servisu sekreta UPF no SNI, aumezmu tempu ami apela nafatin ba komunidade sira atu servisu hamutuk ho membru sira hodi asegura no prevene ema labele hakur liu fronteira ho ilegalmente nune’e ita bele asegura didi’ak ita-nia fronteira”, hatete nia.
Ba atributu GAM PSHT nia ne'e rekolla tanba UPF iha koordenasaun di’ak ho SNI. (*)