BAHU – Terseiru koordenador Partidu Libertasaun Popular (PLP) munisipiu Baukau, Aderito Domin hatene, iha fulan hirak liuba estrutura balun hosi partidu FRETILIN fahe osan hamutuk U$500 ba koordenador PLP suku Trilolo Caisido Baukau, maibé depois uja hikas osan ne’e ba atividade AMP nian.

“Ha’u apresia tebes ba ita nia alin Alippi nu’udar koordenador PLP Trilolo Caisido nian antes ne’e ba tuir konsolidasaun partidu FRETILIN nian, no FRETILIN mós fó tiha osan hamutuk U$500, maibé depois nia uja fali osan sira ne’e ba organiza atividade AMP nian,” hatete Aderito Domin liuhosi nia diskursu iha konsolidasaun AMP nian iha suku Bahu, Baukau, Sabadu (07/04).

Nia hatutan, durante ne’e mós ekipa partidu FREITLIN nian tama – sai uma sira iha Baukau, no promete katak, partidu FRETILIN sei hadia povu sira nia uma, fahe osan no seluk tan.

“Partidu FRETILIN mai promete katak atu hadia povu nia uma no fahe osan, maibé sira atu foti osan hosi ne’ebé atu fahe no hadia povu nia uma,” kestiona Aderito.

Aderito rejeita propaganda partidu FRETILIN katak koordenador PLP suku Buruma inklui xefe suku hamutuk ho nia povu sira deklara afilia ona ba partidu FRETILIN.

“Ne’e propaganda bosok, no realidade sira mak ohin mai hamrik iha oin ne’e,” justifika Aderito.

Iha konsolidasaun ne’e mós, Aderito bolu Alippi ne’ebé simu osan hosi partidu FRETILIN hamutuk ho nia estrutura tomak ba hamrik iha oin nu’udar asaun rejeisaun katak estrutura PLP nian iha suku bahu metin hela.

“PLP manan iha suku Bahu iha eleisaun jeral 2017. Tanba ne’e saida mak partidu FRETILIN halo propaganda kona – bá afiliasaun ne’e bosok,” esplika Aderito.

Militante FRETILIN Nain 57 Afilia ba AMP

Iha konsolidasaun ne’e mós rezulta militante FRETILIN hamutuk ema nain 57 desidi afilia ba partidu AMP. Militante nain 57 mai hosi suku Wailili hamutuk militante nain 36, no hamutuk nain 21 hosi suku Buibau.

Kamarada Cesario deklara afilia ba AMP, tanba uluk Kay Rala Xanana Gusmão hamutuk ho Taur Matan Ruak mak hamutuk hodi liberta rai ida ne’e.

“Agora hamutuk ho AMP dala ida tan hodi liberta povu hosi kiak no mukit,” nia hatete.

Entretantu, Koordenador PLP Baukau, Marcal Buka Tuir agradesde tebes ba afiliante sira hosi partidu FRETILIN ba partidu AMP nian.

“Maibé, ha’u alerta nafatin ba joven sira atu kontinua mantein promove paz no estabilidade hodi labele hamosu instabilidade,” sujere Buka Tuir.

Tempo Timor tenta halo konfirmasaun ba Sekretariu Jeral partidu FRETILIN, Mari Alkatiri kona – bá kestaun ne’e, maibé Alkatiri laiha resposta. (Oki)