Diskusaun entre governante nain rua ne’e katak empregadór sira sei tau pursentu neen (6%) no retensaun pusentu haat (4%) husi empregadu sira. Hafoin remata enkontru ne’e MSSI Armanda Berta husu hanoin ba Alkatiri hodi nune’e bele preve mós orsamentu ba rezime atribuitivu iha RAEOA nia, tanba husi fulan janeiru to’o fulan agostu tinan ne’e governu mak selu nune’e fulan setembru ba oin ko’a ona.
“Nu’udar governu halo komunikasaun mós no buka meiu ne’ebé di’ak hodi hato’o ba prezidente RAEOA hodi haree mós ba iha REAOA nia”, dehan MSSI Armanda ba jornalista sira iha edifisiu ZEEMS Farol, Dili Segunda (22/10).
Prezidente Rejiaun Administrativu Espesial Oe – Kusi Ambeno (RAEOA) atual sekretariu jeral partidu FRETILIN, Mari Alkatiri katak, lei ne’e importante tebes tanba nia vantazen boot ba funsionáriu sira.
Eis primeiru ministru ne’e akresenta orsamentu ba RAEOA ne’e iha 2018 preve ona eh pronto ona atu halo diskonte ba pursentu haat (4%), maibé labe Oekusi resolve iha nasionál seida’uk resolve, tanba ne’e koopersaun no kordenasaun ne’e importante tebes.
“Orsamentu ne’ebé RAEOA hato’o ba parlamentu 2018 ne’e la konsidera tanba tau de’it tokon ruanulu-resin-walu dolares amerikanu, entaun osan ida ne’e la to’o ba buat ida,” hatete Alkatiri.
Traballadór no funsionáriu sira presiza hatene, bainhira sei iha forsa hodi servisu ne’e tenke diskontu, atu nune’e bainhira tempu reforma iha ona subsidiu ruma. (Oli)