Hanesan públiku hatene, iha semana hirak kotuk mosu kritika maka’as husi partidu sira iha AMP rasik ba montante orsamentu iha proposta OJE 2020 hamutuk billaun $1.95 ne’ebé governu AMP lidera husi Primeiru Ministru Taur Matan Ruak aprezenta.
"Primeiru Ministru hamutuk ho diretiva tomak la’o hodi fó ona knaar ne'e tomak ba Ministra Finansas hamutuk ho Parlamentu liu husi Prezidente (PN), Xefe Komisaun sira no Xefe Bankada sira atu hare'e ho di’ak. Redudusaun klaru ke iha, maibé sira sei lori ba diskute lai loron hirak nia laran," informa Koordenadór AMP no Sekretariu Jeral CNRT, Francisco Kalbuadi Lay iha Sentru Formasaun Tibar, Sabadu (16/11).
Maske nune’e, Kalbuadi la informa kona-ba númeru montante OJE 2020 ideal ne’ebé AMP hakarak.
Entretantu, liu husi karta rezolusaun AMP númeru 2/2019 pontu datoluk husu atu halo redusaun ba montante OJE 2020.
Tuir mai desizaun AMP bazeia ba rezolusaun AMP nú.2/2019
AMP endossa Planu Asaun Anual no Orsamentu ba tinan 2020, ne’ebé mak aprezenta hosi Portavoz AMP, nu’udar mos Primeiru Ministru Governu Konstitusional Daualuk, ho observansia ba;
- a. Komentériu no sujestaun ne’ebé aprezenta-ona husi kada responsével Komisaun Parlamentar (Komisaun A to’o Komisaun G) ba kada setor no/ka Lina Ministériu, inklui nosaun atu halo-hikas exersisiu hodi reduz montante OJE 2020;
- b. Ajustamentu ba Planu Asaun Annual, inklui define metas annual nian tenke aprezenta duni husi instituisaun estadu/lina ministériu rasik; no
- c. Asegura kontinuidade no melloramentu sistema Planeamentu no Orsamentu 2020 ne’ebé orientadu ba rezultadu, iha ne’ebé alinadu ho programa tinan lima Governu Konstitusional daualu, inklui alinamentu ho lina orientasaun jeral ne’ebé aprezenta no endossa ona iha Konferensia Nasional daulu AMP nian.