Diretór STAE Baukau, Natividade Freitas Guterres, esplika, relasiona eventu eleisaun parlamentár ne'ebé sei akontese iha tempu badak, mak ekipa STAE Munisípal halo levantamentu dadus ba estrada ne'ebé fó asesu ba sentru votasaun sira, maibé estrada balun presiza halo manutensaun, tanba kondisaun aat no grave.
Hafoin halo levantamentu ba kondisaun estrada remata, STAE submete kedas proposta ba servisu MOP Munisípiu Baukau, hodi hatutan ba nasionál, nune'e bele hetan responde molok hakat ba eleisaun parlamentár.
"Ne'e programa nasionál sira tenke hadi'a dalan sira ne'e para transporte asesu ba sentru votasaun hodi realiza eleisaun", dehan nia iha kna'ar fatin vila nova, kuarta (08/03).
Diretór Servisu Diresaun Ministéiru Obras Públiku (MOP) Baukau, Pedro Alexandre Guterres Perreira, afirma, kondisaun estrada aat ne'ebé ekipa STAE Munisípal halo identifikasaun iha Postu Administrativu-6, hanesan Baukau Vila, Baguia, Laga, Kelikai, Venilale inklui Vemase hamutuk kilometru-39, kompostu husi fatin 16, hanesan Afaloikai, Ossohuna, Samalari, Bordu'u, Atelari, Abuti, Libagua, Abu, Makalaku, Uaiga'e iha mota 2, Ossouala, Uakanasi to'o Loilubu inklui Ossogari.
"Dokumentus ba estrada ne'e ita hatama tiha iha dia 06 fevereiru, ita hein prosesu husi nasionál sé bele mai sedu di'ak liu, tanba estrada hirak ne'e presiza apoiu emerjénsia para eleisaun la'o di'ak", nia akresenta
Tuir planu prosesu manutensaun estrada ligasaun ba sentru votasaun sira, sei hahú servisu husi fulan-marsu-abríl, ne'ebé responsabiliza husi IGE.IP.
Entretantu Munisípiu Baukau nia área luan 1,504.2 km2 kompostu husi Postu Administrativu-6, Suku-59, nia totál populasaun hamutuk 126,562, eleitór provizóriu rihun 90, tuir planu sei estabelese sentru votasaun 150 ba eleisaun parlamentár tinan 2023. (*)