"Nota entendimentu ne'e durasaun tinan lima atu bele asegura, agrikultór sira bele koñese didiak sira nia área atu bele kontribui ba hasa'e ai-han produsaun ba rai laran”, dehan Sekretáriu Estadu Kooperativa (SEKOOP), Elizário Ferreira iha Salaun Federasaun Hanai Malu iha Bairu Pité Segunda, (09/01).
Nune’e, nota entendimentu ne’e, sei bele renova bainhira iha nesesidade presiza, no hahú iha tinan 2023 halo kooperasaun ho KOIKA ba área formasaun e liu-liu reforsa área agrikula ba dirijente sira no populasaun hotu-hotu ne'ebé opera iha agrikola.
Tanba ne'e, Korea International Cooperation Agency (KOICA) liuhusi projetu HADALA sei fo formasaun ba fasilitador sira atu iha koñesimentu sufisiente ba iha área produsaun, no liuhusi projetu ne'e atu melloramentu Kadeia de Valor Agríkola liuhusi partisipasaun Agrikultór sira iha Timor-Leste.
"Nune'e sira bele organiza motiva, no liu-liu halo formasaun dirijente Kooperativa sira inklui estabele Kooperativa Produsaun iha área produtivu sira atu bele kontribui ba dezenvolvimentu ai-han ka aumenta iha ita nia rai laran atu asegura, ai-han iha kualker saida de'it, ida ne'e mak objetivu", nia afirma.
Bainhira remata formasaun, KOICA hamutuk ho ekipa formador sira sei halo servisu parte rejiaun hanesan Aileu, Ainaro, no Likisa.
Alende ne’e, Péritu Kooperativa Koreanu, Jongick Jang ne'ebé mós reprezentante meneger projetu HADALA hatete, sei hala'o serbisu hahú iha rai klaran liu-liu ba área Kooperativa produsaun sira.
"Ba Setór Agríkola sei estabelese no opera koperativa sira iha rejiaun mak hanesan, Aileu - Faularan, Ainaro - HoraiQuic no Likisa Camare - Hohoru", dehan nia.
Dirijente sira ne'ebé tuir formasaun hamutuk ema na'in-20 no durasaun durante loron-tolu. (*)