Prezidente Konsellu Imprensa, Virgilio da Silva Guterres, hatete, produsaun matadalan reportajen eleitoral ne'ebe dadaun lansa, ho nia importansia bele apoiu atividade kobertura nia publikasaun husi jornalista no media sira iha kampaña no eleisaun parlamentar.
"Lansamentu matadalan ne'e opurtunu tebes, tanba iha fulan hirak tuir mai, ita sei iha eleisaun lejislativa, ha'u fiar katak, jornalista Timoroan sira-nia kobertura kona-bá eleisaun sei komprensivu liu kompara ho eleisaun iha pasadu, pelumenus sira tenke hatene ho di'ak kona-bá mekanizmu no siklu eleitorál", dehan nia liuhusi deskursu ba lansamentu matadalan ne'ebé hala'o iha Otel Novu Turizmu, tersa (22/11).
Matadalan ne'e ko'alia liu kona-ba reportajen eleisaun, manuál ida-ne'ebé Konsellu Imprensa dezenvolve ona liu husi projetu eleisaun reziliente COVID iha Timor-Leste (CORE-TL) hodi fasilita kobertura siklu eleitorál nian.
Tanba, matadalan ne'e ho universalmente no kompreensivu kona-ba kobertura eleitorál ba eleisaun tuir mai iha Timor-Leste, iha konsultasaun ho PNUD, jornalista sira, Órgaun Administrasaun Eleitorál (OAE), partidu politiku sira, no observador eleitorál no seluk tan.
Aleinde ne’e, bele mós reprezenta kuadru étiku kona-ba kobertura eleitorál ba relasaun entre partidu polítiku, Órgaun Administrasaun Eleitorál no informasaun públiku durante períodu eleisaun, nomos planeamentu no metodolojia kobertura eleitorál sira.
Reprezentante Vise-Rezidente PNUD, Adeline Carrier, afirma, matadalan relatóriu eleitorál ne'ebe dadaun iha, sei asegura katak, jornalista no média sira hatán ba prinsipiu sira nia reportajen responsavel kona-bá polítika inkluziva no eleisaun sira.
"Media esensial tebes ba eleisaun ne'ebé susesu no pasífika. Atu asegura katak, votante sira bele foti desizaun ho informasaun ne'ebe iha, sira tenke iha asesu ba informasaun ne'ebé justu, loos, no kobertura luan kona-ba partidu polítiku no kandidatu sira ne'ebé sira vota ba. Iha kazu hanesan ne'e, matadalan relatóriu eleitorál sira ne'e asegura katak, jornalista no média sira hatán ba prinsipiu sira nia reportajen responsavel kona-bá polítika inkluziva no eleisaun sira", nia esplika.
Fatin hanessn Reprezentante husi Embaixada Japaun iha Timor-Leste, Kazumi Yamada mós fo parabens ba KI ne'ebe konsege kompila matadalan ba jornalista, atu kontribui harii demokrasia iha nasaun.
"Ha'u hakarak fó parabéns ba Konsellu Imprensa (KI) ba kompila matadalan ho susesu. Hanesan ita hatene, eleisaun livre no justu bazeia iha informasaun ne'ebé loos fundasaun importante ba demokrasia. Ha'u foti oportunidade ida-ne'e atu fó hanoin ba jornalista sira no media kona-bá importánsia husi papel ne'ebé sira asume, tanba Timoroan sira sei ba vota iha eleisaun parlamentar tuir mai nomós eleisaun demokrátika seluk tan iha futuru", nia esklarese.
Enkuantu Projetu UNDP CORE-TL, ne'e hetan finansia husi Governu Japaun, ho objetivu atu promove eleisaun informativu no inkluzivu iha Timor-Leste iha nivel nasionál to'o munisípiu. (*)