"Ha'u nia haree osan 200 dólar ne'e ba ema ne'ebé presiza tebtebes, la'os ba fali ema ne'ebé mak moris di'ak ona," dehan Xefe Bankada KHUNTO, Olinda Guterres iha Parlamentu Nasionál, sesta (30/09).
Tanba, subsidiu fim do ano hanesan presente Natal nian husi Governu atu ba ema sira vulnerável no laiha rendimentu, maibé la'os ba fali Prezidente Repúblika, deputadu no Membru governu.
Tanba ne'e, nu’udar deputada husi Bankada KHUNTO, sei lá simu subsídiu "fim do ano" ho montante US$200 ne'ebé atribui husi governu daualu, maibé husu atu subsidiu ida ne'e atribui ba povu sira ne'ebe ki'ak.
Husu ba Governu liliu Ministériu Solidariedade Sosial no Inkluzaun atu tun ba tama sai populasaun nia uma hodi haree no identifika molok fahe subsídiu.
Xefe Bankada Frente Revolusionariu Timor-Leste no Independente (FRETILIN), David Dias Ximenes 'Mandati', argumenta kona-bá subsidiu fim do ano ne'ebé sei fahe ba uma kain hotu, la'os lá konkorda desizaun Governu, maibé husu atu fo ba ema sira ne'ebé volnuravel liu inklui ema ne'ebé simu vensimentu ki'ik.
"Hau pelumenus la'os lá konkorda desizaun Governu nian, maibé pesoalmente ha'u manan osan, ha'u iha regalias tan saída ha'u mos tenke simu tan US$200, ema sira ne'e saláriu ki'ik hanesan US$500 dolar tun mai kraik ha'u hanoin bele, mais sira seluk ema mak hatene bá, ne'ebé pelu menus ha'u hanoin katak, todan oituan mai ha'u karik ha'u simu," nia afirma. (*)