“Ha'u hatene naturalmente ke sira laiha pasiénsia atu augenta tan. Mais ha'u husu ba para sira iha pasiénsia augenta tan. Tanba iha risku balun ke deznesesáriu loos, liliu sira ba fatin sira ne'ebé laiha serteza para sira bele hetan servisu, tanba ne'e mak ha'u husu para sira kuidadu oituan porque bele prejudika fali sira-nia situasaun’, dehan Taur hafoin Audénsia ho Prezidente Repúblika, José Ramos Horta iha Palásiu Prezidensiál Bairo Pite, kinta (01/09).

Hanesan ezemplu ida mak dadaun ne'e Governu esforsu hela lori fila timoroan balun iha estranjeiru tanba laiha fatin servisu nune'e liuhusi prosesu naruk foin fila mai Timor.

“Balun deporta tan, tanba saida, tanba ita halai lahatene tuir atu ba ne'ebé, risku sira ita la prevene. Ne'ebé ha'u hanoin ha'u husu para joven sira kuidadu oituan”, dehan nia.

Husu ba joven sira sé bele buka hatene loloos atu ba nasaun ne'ebé, no iha kondisaun ka la'e, hafoin bele ba no labele naran ba de'it tanba ne'e sira rasik prejudika sira-nia situasaun. (*)