Xefe suku Nahareka, Paulino A.Ximenes, apresia ba programa governu nia ne'ebé atu fó naroman ba suku hodi bele asesu informasaun iha nível nasionál no fahe informasaun ba nasionál kona-ba potensialidade iha suku laran.

“Kontente ho programa ida ne'e, tanba ida ne'e ho objetivu ne'ebé di'ak ba komunidade sira iha Nahareka, liuhusi programa ne'e sira iha nasionál sira bele hatene potensialidade saida mak iha suku Nahareka, inklui ami mós asesu informasaun saida mak akontese iha nasionál ne'ebá”, dehan Paulino, iha sede suku Nahareka, kinta (07/10).

Sekretáriu Administradór Munisípiu Vikeké, José da Costa, mós agradese ba Governu tanba iha Vikeké suku hamutuk 36 maibé hili ona suku Nahareka hodi implemeta programa Naroman ba suku

“Ami agradese ba ida ne'e, tanba iha Munisípiu Vikeké ne'e suku hamutuk 36, maibé hili ona suku Nahareka ba dahuluk hodi implemeta programa Naroman ba suku ne'e iha ne'e”, dehan nia.

Nune'e suku Nahareka sei sai ezemplu di'ak ba suku sira seluk iha Vikeké, atubele organiza-an hodi kontribui ba prosesu dezenvolvimentu iha nível suku to’o nasionál.

Reprezentante Juventude Suku Nahareka, Jorgino Anacleto, apresia ho programa naroman ba suku ne'e, tanba bele fó benifisiu no lori naroman ba komunidade iha Nahareka tomak.

“Ami agradese ba programa ne'e, no ami prontu atu koopera ho ekipa MAPKomS hodi simu formasaun tékniku hodi fó susesu ba programa ne'e, maibé ami husu ba Governu atu akompaña nafatin ami nune'e ami bele asesu liután”, afirma nia.

Ho programa ne’e Governu implementa ona iha suku 11, hanesan iha munisípiu Lautein, Vikeké, Baukau, Likisá, Bobonaro, Ermera, Manufahi, Aileu, Covalima, no Ainaro, hafoin halo lansamentu ofisiál dahuluk iha suku Rotutu-Manufahi iha tinan 2018. (*)