Tuir xefe suku Uaimori Francelino António Gomes, komunidade konsumu bee mota, tanba laiha bee mós ne'ebé fornese husi governu.

"Komunidade sira infrenta bee mós durante ne'e, sira konsumu de'it bee mota, kuandu tempu udan sira sempre hakur mota mak foin ba kuru bee mós", dehan nia ba www.tempotimor.com liuhusi via telefone, ohin (3/3).

Nia afirma, antes ne'e Organizasaun Caritas Australia mak dada ona bee-moos ba komunidade, maibé dada de'it husi mota, nune'e bainhira tempu udan mota mai estraga hotu kanu no bee foer mak tama fali iha tanki laran, entaun labele konsumu.

Autoriedade lokál ne'e salienta, mota ne'ebé komúnidade sira ba kuru bee-moos ne'e, distansia kuaze kilometru ida. Maibé problema ba komúnidade suku Uaimori, la'ós de'it bee-moos, maibé inklui mós eletrisidade no estrada ne'ebé to'o agora laiha.

"Proposta ha'u sempre halo nafatin liga ba postu, Munisípiu, ate eletrisidade proposta ba nafatin, bee-moos no estrada sira ne'e halo nafatin, maibé laiha governu ida fo resposta", nia afirma.

Entretantu suku Uaimori rasik ho ninia totál  populasaun rihun 200 resin ho totál uma-kai'in 573, ne'ebé kompostu husi aldeia neen, maibé aldeia sira ne'ebé durante ne'e konsumu bee mota mak hanesan Uma-Liurai, Uma-Bo'o, Nunei, no Uibubu ne'ebé ho totál populasaun rihun ida resin mak dadaun konsumu de'it bee mota.(*)