Konstrusaun fíziku ba kapela ne'e rasik dadaun atinji ona pursentu 60, nune'e Don Virgílio do Carmo da Silva espera ho kontribuisaun no esforsu tomak bele finaliza lalais prosesu refere.
"Segundu, antigus alunus, parabéns, dala barak ita rona, antígus alunus enkontru iha ne'e, la'o ba iha ne'ebá, la'o mai iha ne'e,"dehan nia hafoin remata vizita ba konstrusaun uma kapelaun foun iha suku Uaimori, domingu, (28/2).
Nia konsidera, Antígus Alunus ne'ebé hatudu forsa ida de'it, iha tinan ne'e bele realiza obra kapelaun ne'ebé sei sai hanesan lembransa Dombosco iha rai ida ne'e.
Kapelaun ne'e rasik kontribuisaun mai husi sarani, tan ne'e Uaimori mak sei sai hanesan na'in.
"Ne'e duni imi mak halo, no forsa la to'o antigus alunu sira buka atu kompleta, maibé pontu ne'ebé inportante mak ne'e, hahu kedas agora, imi mak halo imi nia liman rasik, no imi nia kosar ben rasik, no imi senti katak, ida ne'e imi nian,"dehan nia.
Nia espera, se srani sira fo duni laran kuida kapelaun ida ne'e, maka ho antigus alunus sira sei kontenti liu-tan wainhira rona, ita boot sira mos hola parte.
"Ne'e duni hau fo parabens tebe-tebes ba lideransa komunitariu, ne'ebé bele sosializa, konsensializa komunidade tomak Uamori, atu harii ita nia uma kreda ida ne'e,"nia parabeniza
Nune'e mós Prezidente Federasaun Nasional Antigus Alunus Dom Bosco Timor-Leste (FNAADBTL), Azevedo Lourenço da Costa Marçal hatete, kapelaun ne'e apoiu direita husi Antigus Alunus Dom Bosco Timor-Leste, inklui komunidade Uaimori no dadaun konstrusaun atinji ona pursentu 60.
Konstrusaun ba Igreja ne'e sei remata iha fulan Outubru tinan 2021, no previstu sei gasta fundu to'o rihun $100.
Nia hatutan, antigus alunu dom bosco Timor-Leste mós fo sira nia apoiu, bazeia ba servisu hamutuk ho Padre Fatumaca, Locateli, no apoiu maximu husi populasaun Uamori, sira rasik kontribui ba iha rai no rai-henek, no sira nia enerjia hodi serbísu.
"Nei-neik ho harii igreja ida ne'e i buat sira seluk sei tuir mai tan, konserteza labele haree de'it ba antigus alunu, maibé fiar katak, komunidade, governu, autoridade lokál, arte hotu-hotu, hau fiar katak sei kontribui, tanba fatin ida ne'e fatin istoriku,"dehan nia
Iha mós planu atu harii rezidénsia ba padre no madre sira iha Uaimori kuandu osan sufisiente.
"Nune'e ita mos sei haree, se iha kondisaun, ita mós sei haree kanaliza bee, nomos haree jardin, no moru sira ne'e,"hatete nia
Iha fatin hanesan Reprezentante prezidente fundu atual Membru Federasaun Nasional Antigus Alunus Dom Bosco Timor-Leste (FNAADBTL) Eduardo Belo Soares hatete, kona-ba implementasun uma kapelaun foun ida ne'e nakloke ba se de'it atu bele fo kontribui.
Populasaun, uma-kain hamutuk 503, kompostu husi aldeia neen, iha suku Uaimori, Viqueque Vila.(*)