“Ami husu Komisaun Antí Korrupsaun investiga kle’an ba sasán cesta bázika ne'ebé governu oferese liuhosi kompaña hodi distribui ba povu iha teritoriu timor-laran tomak,” Reprezentante Komunidade Macadique, Tomé da Conceição informa liuhosi konferénsia imprensa iha Uatulari, Kinta (31/12).
Komunidade hirak ne’e komposta hosi juventude no estudante sira hosi suku refere ne’ebé lokaliza iha munisípiu Vikeke ne’e.
Portavós Tomé da Conceição haktuir, governu fó-sai distribuisaun cesta bázika ba populasaun sira iha fulan rua nia laran, kada ema ida hetan cesta bázika ho folin to'o dolar lima-nulu ($50) maibé realidade la to’o.
Nia fó ezemplu, distribuisaun cesta bázika ba populasaun suku Macadique kada ba produtu sira soma hamutuk ho valór dolar $29.25 de’it la to'o dolar $50.
“Ami Juventude Estudante no komunidade suku Macadique lamenta tebes ba sasán batar, batar uut, fore-mungu tanba governu la halo sosializasaun,” nia lamenta.
Nia parte preokupa hahalok governante no ukun na’in sira-nian tanba Timor-Leste ukun aan tinan 18 ona, governante sira mak kontinua haterus povu.
Nia sujere programa cesta bázika daudaun ne’ebé distribui iha suku Makadique ne’e tenke toma medida tanba la justu no la reflete povu nia moris.
Nia parte kestiona kompañia ne'ebé hetan tenderizasaun laiha kapasidade atu atu ezukuta programa ida ne'e tanba batar no batar-uut ne'ebé sira rekolla laiha kualidade no batar ne’ebé ladún mós.
Reprezentante komuniade ne’e fó hanoin autoridade suku Makadique atu-bele halo reflesaun nune'e iha futuru tenke sai liman-ain no tilun ba povu, labele kari rai-rahun ba Povu. (*)