Kondisaun ida ne'e obriga komunidade balun atu kontinua hala'o atividade hanesan loron baibain atu bele hetan netik osan hodi sosa hahan.

Komunidade sira husi suku rua, Ossu Decima no Uabubu, postu administrativu Ossu, Munisipiu Vikeke, deside la kumpre estadu emerjensia (EE) tanba nesesidade uma laran ne'ebé obriga.

Xefe Suku Ossu Decima, Celestino Monteiro de Carvalho informa, nesesidade baziku obriga komunidade sira tenke halo movimentu ba mai hodi buka hahan.

"Iha ha'u-nia suku, komunidade hotu-hotu duvida no halerik, tanba (Prezidente Repúblika-red) dekreta tiha estadu emerjensia hodi bandu komunidade labele sai husi uma, maibe kestaun ida kondisaun, tanba han mak moris," dehan nia via telefone, Sabadu (25/04).

To'o iha Sabadu, nia dehan, komunidade iha suku refere sei hala'o atividade negosiu hanesan baibain.

"Ha'u-nia komunidade sei ba-mai merkadu fa'an modo, tanba kestaun nesesidade mak obriga sira tenke sai duni husi uma par ba merkadu, dala-ruma seguransa sira tuun mai trava maibé ha'u dehan labele trava sira, tanba dekreta estadu emerjensia maibé kondisaun laiha ba sira," dehan nia.

Tuir nia, estadu TL bele dekreta estadu emerjensia, maibé governu tenke kria kondisaun ba ninia komunidade sira, se la'e komunidade sei la kumpre.

"Tenke kria kondisaun ba komunidade, se lae bele halo regulamentus to'o iha ne'ebé mos sei la vale, kontinua halo movimentu hodi buka hahan no osan," nia afirma.

Iha fatin ketak, Xefe Suku Uabubo Joanico Maria Alves da Cruz hatete, estadu emerjensia fó impaktu ba komunidade ninia ekonomia tanba defisil ba komunidade sira atu ba hala'o negosiu iha merkadu ne'ebé fó impaktu ba sira-nia rendimentu.

Aleinde kestaun ekonomia, Xefe Suku ne'e dehan, implementasaun EE ne'e mós fó impaktu ba aspeitu sosial no kultura.

Iha aspeitu sosial, nia dehan, familia no viziñu sira labele vizita malu no halo komunikasaun. Iha aspeitu kultura mak komunidade labele halibur malu hodi koalia lia mate no lia moris.

"Kuandu mate mós labele demora, loron ida-rua tenke hakoi ona," nia hatete.

Entretantu, tuir dadus provizoriu, total uma-kain iha suku Ossu Decima hamutuk 1.077 ho total populasaun na'in 6.971 ne'ebé fahe ba aldeia 8. Enkuantu total uma-kain iha Suku Uabubu hamutuk 600 ho total populasaun na'in 3.300 ne'ebé espalla iha aldeia 5.