Komunidade Vikeke Hasoru PR Lu Olo, Ezije Promesa MS Harii Ospital Distrital

Reprezentante komunidade Vikeke nian koalia hela ba midia iha palasiu PR, Dili (28/10) Reprezentante komunidade Vikeke nian koalia hela ba midia iha palasiu PR, Dili (28/10) Foto tempotimor.com

Tempotimor (Dili)-Reprezentante komunidade Vikeke ezije ba Ministériu Saúde (MS) atu kumpri promesa hodi harii Ospital Distrital. Reprezentante Komunidade Vikeke ohin, Segunda (28/10) hasoru Prezidente Repúblika Francisco Guterres Lu Olo hodi hato’o sira-nia ezijensia.

Reprezentante Komunidade Vikeke, Octavio Sequeira, ne'ebé hanesan mós mediku iha Sentru Entrenamentu Vikeke informa, tuir planu MS hahú kedan husi governu dahuluk katak munisipiu ne’ebé ninia populasaun atinze na’in 50.000 iha direitu atu harii ospital distrital ida.

La’os haree de’it ba númeru abitantes, maibé, nia hatutan, haree mós ba area jeografika katak munisipiu refere bele kobre ba munisipiu sira seluk ne’ebé nia area besik liu.

“Ami mai hasoru Xefe Estadu hodi hatan ba ezijensia komunidade Vikeke, veteranus inklui joven husi munisipiu refere katak iha tinan 1 ne'e ou iha oin mai bele transforma Sentru Enternamentu ba ospital distrital," dehan Oscar iha Palasaiu Prezidensial Bairo-pite, Sesta (28/10/19).

Aleinde ne’e, nia hatete, nia parte mós aprezenta proposta atu haruka mediku espesialista ba Sentru Enternamentu (SE) Vikeke, tanba númeru pasiente ne’ebé transfere kada tinan sempre aumenta.

“Iha tinan kotuk por volta 800 no tinan ida ne'e por volta de 900,” dehan nia.

Proposta ne’e, nia informa, aleinde entrega ba PR Lu Olo, nia parte mós entrega ona ba Primeiru Ministru, Parlamentu Nasionál, inklui mós Ministériu Saúde.

Kona-ba espesialista ne’ebé presiza, pesoal saúde ne’e dehan, SE Vikeke presiza espesialista iha area cirurgia, padiatria, internista no espesialista ba kuidadu oan ho inan.

Daudauk ne’e, nia dehan, mediku sira ne’ebé serbisu iha SE Vikeke mediku jeral hotu de’it.

“Iha mediku Kubanu nian ne'ebé ho esperensia maka’as maibé sira laos espesialista ba area sira ne'ebé temi ona atu bele atende ba serbisu ne'e ho espesifikamente.”

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com