Tempotimor (Baukau)-Ékipa susesu husi kandidatu Prezidente Repúblika ho númeru sorteiu 9, Armanda Berta dos Santos iha Munísipiu Baukau, prontu atu rekopera kondisaun vítima na'in-3 nian iha Suku Tirilolo, Postu Baukau Vila, ne'ebé hetan estragus husi militante, maibé tenke tuir lei.

Prezidente ékipa susesu Armanda Berta iha Munísipiu Baukau, Angelo Angelito Freitas Correia, hatete, militante desloka husi Postu Adminisitrativu ba fatin kampaña, hetan ona brifing no simu esklaresimentu tuir akordu ne'ebé asina liuhusi paktu segúransa.

Nune'e, militante desloka husi Postu, la lori sasan kroat ruma iha karreta laran, maibé sasan ne'ebé lori mak hanesan atributu kandidatu PR númeru sorteiu 9 nian.

Maibé, iha dalan vila antiga Baukau (kota lama) hetan provokasaun husi maluk advesariu realiza mini kampaña (Fretilin) hodi rezulta militante kandidatu PR númeru sorteiu 9 balun hetan kanek inklui estraga karreta balun.

"Sasan ne'ebé estraga ne'e, masa mak mai einkontrolu, konserteza akontese nune'e, maibé parte husi ami kolabora hadi'a kondisoins hirak ne'e, maibé tuir regras (lei) la'o nafatin tuir nia dalan," dehan nia iha sede partidu Khunto Uatulete, segunda (07/03).

Nune’e, prontu kopera ho parte segúransa PNTL, no Komisaun Nasionál Eleisaun (CNE-sigla portugues) Baukau, bazeia ba formuláriu reklamasaun hodi prosesu kazu refere.

Kampaña komisiu husi kandidatu PR númeru sorteiu 9 iha loron 06 fulan-marsu tinan-2022 (hoseik) militante hamutuk karreta 69 naran rezistradu iha partidu Khunto.

"Militantes ne'ebé mai edukadu kontroladu, tanba segúransa husi Postu mak akompaña, sira laiha intensaun aat atu halo konfrontu tuir dalan," nia argumenta

Tanba ne'e, husu reprezentante kandidatu na'in-16 iha Baukau, halo koperasaun di'ak atu labele hamosu konfrontasaun no perturbasaun.

"Parte CNE no segúransa, se tabrak labele halo (kampaña) oras ida nia laran, labele iha roúte ne'ebé hanesan, nune'e labele perturba hanesan horseik," nia informa

Enkuantu militante husi kandidatu PR númeru sorteiu 9 balun hetan kanek hafoin fila husi fatin komisiu kampaña kampu futebol Suku Triloka, inklui karreta bus-ida no truk-ida hetan estragus

Relasiona konfrontu iha vila antiga Baukau, www.tempotimor.com tenta konfirma parte ékipa susesu partidu Fretilin Baukau, maibé la fó komentáriu. (*)