Tempotimor (Díli)-Hafoin inséndiu iha Eis merkadu Comoro ne'ebé akontese iha Kinta (29/07) madrugada, iha parte kalan Eis Prezidente Repúblika Timor Leste Xanana Gusmão hala'o vizita kedas komunidade vítima inséndiu iha fatin refere no lori mós apoiu non-food items ba vítima sira.

Iha vizita ne'e komunidade no vítima inséndiu sira simu atuál Prezidente partidu Kongresu Nasionál Rekonstrusaun Timor Xanana Gusmão, hodi hakilar Viva Avo Nana no Viva CNRT, maibé Xanana bandu no lakohi komunidade temi CNRT nia naran.

"Labele temi CNRT, tanba ha'u mai la'ós CNRT" si'ak Xanana Gusmão ho espresaun hirus ba komunidade sira iha eis Merkadu Comoro, Kinta (29/07).

Hafoin la'o hale'u fatin inséndiu ne'e jornalista www.tempotimor.com mós hetan Komunikasaun líder nasionál kona-ba lista vítima inséndiu sira nian.

"Fo to'ok lista ne'e mai ha'u haree" katak Xanana.

Alende ne'e vítima inséndiu Feliciano Amaral sente kontente no orgullu tanba hetan vizita husi Xanana Gusmão iha Merkadu Comoro.

"Ha'u kontente no orgullu tebes tanba Avo mai vizita netik ami," dehan Feliciano iha Merkadu Comoro.

Entretantu kareta baskolante ida ne'ebé akompanha líder Nasional ne'e nakonu ho sasán non-food item hanesan lona, biti no seluk tan.(*)

Tempotimor (Dili)-Polísia Nasionál Timor-Leste (PNTL) kaptura ona suspeitu ho inisial FAT ne'ebé deskonfia sunu uma iha eis merkadu Komoro, Aldeia 02, suku Fatuhada, Postu Administrativu Don Aleixo, Munisípiu Dili, kinta (29/7), tuku 05:00 madrugada oras Timor-Leste.