Tempotimor (Dili) – Sekretáriu Estadu Protesaun Sivíl (SEPS), liu husi Diresaun Nasionál Gestaun Riskus Dezastres (DNGRD), iha tempu badak sei fó apoiu faze dahuluk,  ba  vítima dezastre naturais husi tinan 2018, hamutuk xefe família 1.881 husi munisípiu 8.

Entretantu, tuir planu programa rekuperasaun nee, sei hala'o iha loron 17 Setembru tinan ne'e. Neebé hetan lansamentu dahuluk iha Munisípiu Baucau no Covalima no sei remata iha loron 31 Outubru tinan nee.

Alende ne'e, distribui subsídiu rekuperasaun ne'ebé SEPS fó ba xefe família hirak ne'e, ho kategoria apoiu hanesan, materiál konstrusaun, pagamentu Cash, Ai-kuadradu no Mão de Obra. No xefe família 1,881 nee, mai husi munisípiu 8, hanesan Baukau, Vikeke, Manatutu,  Aileu,  Manufahi, Covalima, Ainaru no Likisa.

Alende ne'e, dadus restu hamutuk xefe família 1.095, husi munisípiu 4, hanesan Bobonaru, Ermera, Dili no Lautem, sei halo fali iha faze daruak nian ho orsamentu 2020.

Liuhusi konferénsia imprensa, SEPS Alexandrino de Araújo hatete orsamentu 2019 nian ne'ebé prevé ba DNGRD hamutuk $ 944. 907. Husi orsamentu ne'e, fó apoiu ba iha tipu emerjénsia no rekuperasaun.

Tuir nia, orsamentu ne'ebé distribui ba benefisiáriu 1.881 nee, hamutuk $ 599, 340, Mão de Obra hamutuk $ 282, 150 no Ai-kuadradu hamutuk $ 317, 190.

Nia dehan, asegura transferénsia ba distribuisaun, SEPS forma ona ekipa ida, kompostu husi SEPS, Ministériu Interior, Ministériu Finansas, Ministériu Administrasaun Estatál, PNTL no seluk tan.

“Sekretáriu Estadu Protesaun Sivíl, Ministériu Interior, Ministériu Finansas no Polisia hamutuk para bazeia ba dadus ne'e, hodi entrega osan nomós materiál konstrusaun ba ita nia povu ne'ebé mak afeta ba iha dezastre naturais,” Informa Alexandrino ba jornalista, iha nia knaar fatin, SEPS-Kaikoli, Sesta (13/09/19).

Nia dehan, vítima sira ne'e sei simu orsamentu nomós material konstrusaun tuir nivel estragus ne'ebé mak iha. Governante ne'e, husu ba benefisiáriu sira atu utiliza didi'ak apoiu hirak ne'e, hodi harii filafali uma ne'ebé  estragus ona.  Tanba SEPS sei koordena ho ofisiál polísia suku no autoridade lokál, hodi kontrola atu nune'e prevene fa'an fali material ne'ebé Governu apoiu.

Tempotimor (Dili) – Kandidatu forte ba Prezidente Rejiaun Administrativa Espesiál Oe-Cusse Ambeno no Zona Espesiál Ekonomia Sosiál Merkadu (RAEOA-ZEESM), José Luis Guterres (LUGU) promete, sei halakon sistema partidaria iha RAEOA-ZEESM.

José Luis Guterres hato'o ninia promesa, hodi hakotu públiku ninia hanoin durante Dr. Mari Alkatiri asumi kargu nu'udar Prezidente RAEOA-ZEEMS. Ema barak akuza, atuál Sekjer Partidu FRETILIN ne'e, partidariza RAEOA-ZEEMS.

"Ita labele partidariza demais ita nia rai iha munisípiu sira. Maibé, ita fó oportunidade ba Oe-Cusseoan sira ne'ebé profisionais atu bele ita hamutuk hodi ajuda kaer para bele hadi'a rai Oe-Cusse no fó mós sira-nia kontribuisaun," nia dehan.

Tuir eis Ministru Negósiu Estranjeiru no Kooperasaun (MNEC) ne'e, bainhira simu ona pose husi Primeiru Ministru Taur Matan Ruak hodi hala'o servisu jestaun iha RAEOA-ZEESM nia sei halibur intelektual Oe-Cusseoan atu servi ba povu Oe-Cusse.

Nia dehan, laiha hanoin ne'ebé negativu ba relasaun ho administrasaun anterior. Maibé, nia respeita ema tomak ne'ebé fó ona kontribuisaun ba dezenvolvimentu rai Oe-Cusse.

"Hau hanesan ema kombatente, labele eskolha buat ne'ebé di'ak ba ha'u nia-an, maibé, la hases ou halai husi difikuldade no dezafius ne'ebé iha. Tanba, vida hanorin ita la'ós buat ne'ebé fasil ba ita dei't. Maibé, atu hanoin ba povu nia moris. Kuandu  dezafius no difikuldade balun mak ita sei buka mos solusaun," tenik LUGU.

Tempotimor (Dili) – Relasiona ho International Federation Commerce nia relatoriu  katak Timor-Leste ne'ebé konsidera ambiente negósiu iha TL ladún di'ak, Xefe Governu Taur Matan Ruak husu atu labele halo komparasaun ho nasaun avansadu sira.

"Kona-ba ambiente negósiu nian iha nivel internasionál, klaru katak ita preokupa kona-ba bem negósiu no Governu tenke servisu maka'as para hadi'a ambiente ne'ebé la fasil. Tanba, mundu ohin ne'e kompetetivu liu," dehan Xefe Governu iha Palásiu Prezidensiál, Bairru-pite, Kinta (07/11/19).

Maske tuir relatoriu IFC Katak, Timor-Leste lakon ho nasaun konflitu sira kona-ba bisnis nian, ne'ebé  iha númeru 181, kompostu husi nasaun 187, maibé Taur rezeita katak iha kestaun balun mak implika ba kondisaun ne'e.

"Ita 17 anos labele kompara ita nia an ba nasaun ne'ebé avansadu. Ida fali mós kondisaun ne'ebé nasaun sira fó ba emprezáriu, di'ak liu ita nian. Entaun, ita mós tenke esforsa para fó ita nian," Taur esplika.

Alende ne'e, ema mós sei konsidera TL nia nasaun hanesan nasaun ida ne'ebé foin sai husi konflitu, entaun ne'e la mai. TL  mós tenke hatudu katak iha kbiit para jere nia nasaun, loke no fó ambiente negósiu ne'ebé diak.

Pelo faktu ne'ebé hare'e foin daudauk lori emprezariu no investidór mina sira iha ita nia rain no agora inisiativa sira ne'e investimentu iha área petroleu ne'e hatudu katak neneik ba neneik ema komesa konfia ita nia rain.

Agora so ke seidauk to'o. Tenke maka'as liután, instituisaun sira tenke forte kombate birokrasia, halo sasán lalais, transparente furak ne'e importante tebes.

Tuir emprezariu timoroan no emprezariu Internasionál sira balun dehan, fundamentu Timor-Leste  nasaun ne’ebe bele sai proferida liu. Maibé, realidade hafoin tinan 17 nasaun ne'e ukun rasik an  Timor-Leste nia ranking kona ba labarik sira sofre Malnutrisaun numeru as tebes.

“Fundamentu, Timor-Leste nasaun ida ke riku tebes ho rekursu naturais, laiha tusan ke boot hanesan nasaun seluk. Iha líder briliante istóriku sira, unidade metin tanba maioria Katóliku, jovens matenek barak. Maibé, realidade depois tinan 17 ukun rasik an, nasaun nia desenvolvimento la'o neineik, númeru desemprego barak, númeru labarik sofre mal nutrisaun boot,” dehan emprezariu ida ne'ebé  husu ba tempo timor labele publika nia naran.

Tempotimor (Dili) – Maski la temi kuantia, Ministra Edukasaun Juventude no Desportu (MEJD), Dulce de Jesus Soares rekoñese númeru eskola ne'ebé infraestrutura aat iha Timor-Leste aumenta.

"Hau rekoñese, iha TL eskola barak mak ninia infraestrutura sei iha problema nia laran. Maibé, ita mós hare'e katak iha tinan oin mai Governu kontinua tau nafatin esforsu, atu hadi'a eskola hirak ne'e," dehan MEJD iha Timor Plaza, Tersa (19/11/19) hafoin halo lansamentu ba Manual Inspesaun Eskolar nian.

Nia dehan, la'ós problema infraestrutura de'it. Maibé, estudante balun laiha kadeira hodi tuir aprendizajen. Ho nune'e, MEJD konsidera ida ne'e hanesan dezafiu ida ne'ebé tenke tau atensaun.

"Ida ne'e mak dezafiu iha edukasaun no dalan ida de'it mak Governu tau osan. MEJD iha planu di'ak  no iha tinan mai bele responde," nia dehan.

Inspetor Eskolar

Iha fatin hanesan, MEJD mós konsidera difikuldade ne'ebé inspetor eskolar sira enfrenta iha baze, nu'udar frakeza husi ministeriu nian.

"Hau labele ezise deit husi imi. Maibé, tenke prepara mós kondisaun hanesan motor no kombustivel.  Tanba distansia ne'ebé dook atu kobre ba área kobertura sira," Dulce dehan.

MEJD ne'e mós rekoñese, iha inspetor balun mak halo ona servisu liu tiha fali kapasidade ne'ebé nia iha, no dalaruma kobre liu númeru estandarte.

“Ho kondisaun eskola ne'ebé dook, kada inspetor tenta hodi halo rasik nia oráriu ba loron inspeksaun. Ho nune'e, maske dook maibé bele kobre hotu,” Dulce akresenta.

Nia dehan, iha futuru inspetor eskolar ida sei reponsabiliza ba eskola 20. Maibé, oras ne'e daudauk MEJD iha de'it inspetor hamutuk 91. “Ho nune'e iha tinan 2020 sei halo rekrutamentu ba inspetor jerál  hamutuk 120 ho nune'e bele hatán ba problema ne'ebé iha.”

Tempotimor (Dili) – Prezidente Komisaun D, Parlamentu Nasionál Virginia Ana Belo hakfodak ho lista asesor ne'ebé servisu ho VIII Governu, hamutuk ema na'in 1.014.

"Lista asesores ne'e ami simu husi Ministra Finansas. Iha lista ne'e, númeru asesor boot uitoan. Kuaze ema na'in 1.014. Ne'ebé, ami nia pensamentu kuandu númeru asesor barak, diak liu troka tiha funsaun públiku. Ita lalika servisu. Asesor sira mak servisu de'it," dehan deputada Virgina Ana Belo iha resintu Parlamentu Nasional, Kuarta (13/11/19).

Virginia promete, sei buka tempu par Governu ho PN ko'alia tok kona-ba asuntu ne'e. Tansá Governu presiza asesor barak hanesan ne'e.

Prezidente Komisaun D ne'e mós fó ezemplu kona-ba asesor ho númeru barak iha nasaun dezenvolvidu, hanesan iha Doha no Dubai. Nia hatete, kuandu tama iha sira nia instituisaun públiku, asesor rai nain %50 no estranjeiru %50. Mas, nia dehan, ida ne'e kestaun tanba nasaun ne'e osan barak.

"Ita Timor-Leste, ita-nia populasaun barak i ema barak. Nusa mak ita lakohi kapasita ita nia ema. Asesor husi estranjeiru de'it mak servisu, no fim ita nunka aprende buat ida. Parlamentu de’it nia asesor kuaze nain 10 hanesan ne'e de'it. Nusa mak Governu iha asesor barak hanesan ne'e? Asuntu ne'e ami sei ko'alia iha nivel Parlamentu no Governu," Virginia afirma.

Maski nune'e, nia rasik seidauk sura asesor sira ne'e tuir nia kategoria. Husi estranjeiru na'in hira nomos rai-laran na'in hira.

Virginia mós esklarese, saláriu ba asesor nasionál no internasionál iha diferensia. Tanba asesor nasionál kada fulan hetan $5000-7000 de'it. Maibé, asesor internasionál kada fulan hetan $10.000-20.000.

"Númeru asesor nasionál mak barak ne'e ha'u aseita, par bele subtitui. Maibé, sei asesor internasionál mak barak ha'u la aseita. Tanba ne'e, ha'u sei husu ba Governu par bele haree ba asuntu ne'e," Virginia tenik.

AMP Blokea Viajen PR  

September 16, 2019

Tempotimor (Dili) – Ohin, Segunda (16/09/19) deputadu sira husi bankada Governu iha Parlamentu Nasionál (PN), blokeia viajen Prezidente Repúblika (PR).

Proposta kona-ba viajen PR ba partisipa Asembleia Jerál UNO iha Nova Iorke, la pasa ho rezultadu 27 vota kontra, 20 a favor ho 1 abstein. Ho ida ne'e, proposta la liu, no dala ida tan PR labele halo viajen ba rai liur.

Vise II Prezidente Parlamentu Nasionál, Luis Roberto da Silva hatete, AMP vota kontra tanba Prezidente Repúblika seidauk rezolve impase polítika iha rai laran.

Iha Jullu 2018, bainhira Primeiru Ministru VIII Governu Konstitusionál, aprezenta lista naran nain sia (9) nu'udar kandidatu membru Governu sira, Prezidente Repúblika (PR) Francisco Guterres Lú Olo hanesan mós Prezidente FRETILIN rejeita, sem esplikasaun klaru kona-ba kandidatu nain sia (9) ne'e.

Deputadu AMP hatudu sira-nia kbiit, hodi vota kontra viajen PR hodi ba partisipa Asembleia Jerál UNO iha Nova Iorke. Ho ida ne'e, ba dala barak ona proposta viajen PR nian ba rai liur labele realiza, tanba to'o de'it iha Parlamentu Nasionál.

Tempotimor (Dili) – Parlamentu Nasionál, Segunda (23/12/19) aprova ona pedidu husi governu, kona-ba debate urjénsia ba proposta lei Orsamentu Jerál Estadu (OJE) tinan fiskál 2020. Aprovasaun ne'e ho votus  favor 37, kontra no abstensaun 0.

Deputadu Bankada KHUNTO, Luis Roberto hatete, governu nia pedidu urjénsia ne'e importante. Tanba, rejimentu PN nian mós fó dalan.

"Ba ha'u, proposta governu nian ne'ebé mai ho urjénsia ne'e, ita nia rejimentu iha artigu 97 ne'e fó dalan. Tanba ne'e, karatér urjénsia ne'e ita mak husu ba ita nia an," tenik Luis.

Iha fatin hanesan, deputadu António da Conceição afirma, maske proposta ne'ebé governu aprezenta ba PN iha loron Sesta (19/12/19) nu'udar proposta foun, maibé nu'udar kontinuasaun ida husi proposta ne'ebé retira ona husi governu.

"Ita haree ba proposta ne'ebé  governu aprezenta ne'e, importante tebes, ba vida nasaun nian, maka Orsamentu Jerál Estadu. Maski governu la fó razaun fundamentál, maibé ha'u halo leitura katak, iha razaun tanba primeiru governu aprezenta no debate tiha ona,  depois retira no ba hadi'a depois aprezenta fali," afirma António.

Entretantu, deklarasaun husi deputadu hirak ne'e fó biban ba Ministru Reforma Lejistativa Asuntu Parlamentar (MRLAP), Fidelis Manuel Leite Magalhães atu fó razaun ba PN, kona-ba pedidu urjénsia, nasaun presiza moris ho orsamentu. Inklui mós hodi labele dada tempu naruk ho orsamentu duadesimál.

"Nune'e, orsamentu ne'e urjensia ka lae, depende ba desizaun plenária. Maibé atu dehan katak nasaun ida atu moris presiza orsamentu," dehan Fidelis.

Tempotimor (Dili) – Ekipa ida, lidera husi eis Prezidente interinu RAEOA-ZEESM, Arsenio Paixão Bano, Segunda (18/11/19) fó briefing kona-ba lala'ok seitór hotu iha RAEOA-ZEESM ba Prezidente foun RAEOA-ZEESM, José Luis Guterres ‘Lugu’, iha edifísiu ZEESM nian, Farol-Dili.

"Ohin ami mai ekipa boot husi RAEOA-ZEESM, kompostu husi sekretáriu nain 6 no ami ekipa hamutuk 22 ho téknika sira tomak. Ami mai fó briefing tomak ba seitór hotu. Hanesan seitór finansas, agrikultura, ordenamentu territóriu, saude no servisu jerál iha Oekusi," dehan Arsenio Bano ba jornalista.

Tuir Bano, husi sira-nia aprezentasaun, Prezidente foun RAEOA-ZEESM, inklui ninia asesór tenta rona hotu. Tanba, iha servisu barak ne'ebé presiza halo iha RAEOA.

Alende ne'e mós, Bano dehan, parte téknika hato'o sira nia preokupasaun kona-ba orsamentu tinan 2020. Tanba, iha programa no ambisaun barak hakarak Oekusi sai pilotu, tuir mehi Timor-Leste nian.

“Iha pilotu barak sempre iha difikuldade barak. Nune'e, prezidente foun presiza rona maka'as husi téknika sira, kona-ba aprezentasaun ne'e,” nia esplika.

Tempotimor (Dili) – Maski kada tinan, Parlamentu Nasionál (PN) aprova Orsamentu Jerál Estadu (OJE), maibé povu halerik nafatin kona-ba dezenvolvimentu. Povu barak, liuliu iha área rurál seidauk sente dezenvolvimentu mosu iha sira-nia leet.

"Ha'u hanoin, parte ida sira iha razaun. Maibé, parte ida mós laiha karik. Tanba, ita iha Orsamentu Jerál Estadu, ne'ebé kada tinan ita halo implementa. Liuliu, orsamentu la'o hela. Ne'ebé, naturalmente atividade la'o," dehan Primeiru Ministru Taur Matan Ruak iha Palásiu Prezidensiál Bairru-pite, Tersa (22/10/19).

Xefe Governu ne'e afirma, atividade dezenvolvimentu iha rai laran la'o hela. Nia mós halo komparasaun kona-ba kresimentu ekonomia ne'ebé iha tinan 2019 sa'e, kompara ho tinan kotuk.

"Se ita boot sira (jornalista) kompara 2019 ho 2018 no 2018 ho 2017, kompletamente iha mudansa. Ita boot sira haree prozesaun agora kresimentu (ekonomia) ba 2019 ne'e, pursentu 5.1," Taur afirma.

Nia dehan, iha 2018 no 2017 resesaun ekonomia iha pursente 3.5. “Entaun dehan atividade la la'o ne'e oinsá? Ha'u hanoin la'o ho di'ak," nia tenik.

Tempotimor (Dili) – Konsellu Ministru, Kuarta (11/09/19) aprova ona rezolusaun Governu nian kona-ba Kompozisaun Komité Previzaun Polítika (KKRP), ne'ebé aprezenta husi Ministra Finansas, Sara Lobo Brites.

"Konsellu Ministru aprova rezolusaun Governu nian, ne'ebé aprezenta husi Ministra Finansas, kona-ba definisaun husi Kompozisaun Komité  Revizaun Polítika, hanesan mós kriasaun husi Komité Revizaun Orsamentu Kapitál  Dezenvolvimentu, husi Komité Tékniku Kapitál  Dezenvolvimentu Kapitál Umanu," dehan Ministru Estadu Konsellu Ministru, Agio Pereira iha Palásiu Governu.

Ministru ne'e reforsa, husi aprovasaun ba rezolusaun Governu ne'e, bele ajuda Komité  Revizaun Polítika.

"Ho nune'e bele ajuda Komité Revizaun Polítika, iha nia servisu husi avaliasaun ba alokasaun estratejia, rekursu ho forma, atu atinje nia kompromisiu no objetivu sira, ne'ebé konsta iha dokumentu estratéjiku, no sai sasukat ba exibilidade husi planu ba tinan finanseiru ne'ebé  bele report filafali," Agio haktuir.

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com