Tempotimor (Dili) – Prezidente Autoridade Munisípiu Baucau, Antonio Guterres hatete, populasaun Munisípiu Baucau ne'ebé iha tempu barak la asesu ba eletrisidade, ikus mai hela de'it %18 hodi kompleta %100.

"Infraestrutura báziku iha Munisípiu Baucau iha avansu mak eletrisidade. Tanba iha ona %82. Ita iha aldeia 281, entaun iha aldeia 228 mak eletrisidade kobre ona, hetan naroman ona. Maibé, ba nivel suku ne'e suku tolu mak seidauk asesu eletrisidade hanesan Ossouala, Namanei no Maluro," dehan Antonio Guterres iha Ministériu Finansas, Aitarak Laran, Sesta (13/09/19).

Alende ne'e, kona-ba bee-moos iha Munisípiu Baucau, komunidade hamutuk aldeia 218 mak konsumu ona bee-moos.

"Eintermus bee-mos, ita nia komunidade sira husi aldeia 281 ne'e, aldeia 218 mak asesu ona ba bee-moos," Prezidente Munisípiu Baucau ne'e realta.

Tuir Antonio, iha tinan rua nia laran, Governu hasoru empase polítika. Maibé, Governu lokál  hamutuk ho parseiru sira hanesan sosiedade sivil, kontinua fornese bee-moos ba komunidade sira iha aldeia 218 ne'ebé asesu bee-mos.

Aldeia hirak ne'ebé to'o oran ne'e seidauk asesu eletrisidade hamutuk aldeia 53, no komunidade aldeia 63 mak seidauk asesu ba bee-mos.

 

Tempotimor (Dili) – Ministru Interiór (MI) interinu, Filomeno da Paixão de Jesus informa, kazu osan $ 4.230.00 ne'ebé lakon iha Imigrasaun Oe-Cusse, agora dadaun ne'e iha ona prosesu investigasaun.

"Membru sira ne'ebé komete iha iregularidade iha Oe-Cusse, dadaun iha hela Komandu PNTL Kaikoli Dili hodi hala'o investigasaun," dehan MI interinu iha edifísiu MI, Vila-Verde, Sesta (27/09/19).

Ministru subliña, bainhira kazu Imigrasaun Oe-Cusse ne'ebé osan lakon ne'e, iha ona kazu balun ne'ebé tama uluk ona iha Komisaun Anti Korrupsaun (KAK).

"Antes kazu Oe-Cusse mai, kazu balun tama uluk ona iha KAK. Nune'e, membru sira ne'ebé komete iregularidade dadaun la hala'o ona servisu iha fronteira. Tanba iha hela komandu investigasaun kriminál nian," afirma Paixão.

Tempotimor (Dili)- Komisaun Revizaun Orsamentu Jerál Estadu (KR-OJE) aprova orsamentu tokon rua resin ba Ministériu Koordenadór  ba Asuntu Ekonomiku (MKAE) ba tinan 2020.

"Ohin Ministériu Koordenadór ba Asuntu Ekonomiku (MKAE) aprezenta proposta orsamentu tinan 2020 nian, ne'ebé hetan apresiasaun pozitivu husi Komisaun Komite Revizaun Orsamentu (KKRO). Ne'e, hatudu rezultdu ne'ebé di'ak. Hein de'it faze tuir mai ba iha Parlamentu Nasionál," dehan Ministru Koordenadór ba Asuntu Ekonomiku interinu, Fidelis Leite Magalhães iha Ministériu Finansas, Kinta (12/09/19).

Nia dehan, orsamentu ne'ebé Governu preve ba MKAE hamutuk milioens rua resin. "Agora, sei iha diskusaun finál ne'ebé pur volta milioens rua resin (US$ 2 Milioens) no orsamentu adisionál ba tinan ida nian ho pakote $700.000," Fidelis Informa.

Ministru interinu ne'e mós halo estimasaun ba orsamentu ne'e.  Nia dehan, importante liu mak milioens US$ 1.5

"Diskusaun ne'ebé ohin ami aprezenta ne'e pur volta tokon rua resin. Maibé, ha'u rasik horikalan no ohin dadeer tetu no razoavel liu maximu milioens US$ 1.5 mak iha ne'ebá. Tantu, prepara adezaun Timor-Leste nian ba Organizasaun Mundial Komérsiu no prepara ba apoiu ne'ebé ita fó liuliu ba kapasitasaun iha seitor ekonomiku nian," nia esklarese.

Fidelis fiar katak, iha tinan oin MKAE sei servisu di'ak liután ho Kámara Komérsiu no Indústria Timor-Leste (CCI-TL), ba kapasitasaun seitor privadu.

Programa importante MKAE nian iha tinan 2020 nian, mak ba organizasaun mundiál  komérsiu, servisu hamutuk ho CCI-TL, kapasitasaun iha MKAE nia laran hodi eleva planu MKAE nian iha futuru.

Tempotimor (Dili) – Ministra Finansas interina, Sara Lobo Brites relata, ezekusaun Orsamentu Jerál Estadu (OJE) tinan 2019, atinje ona % 60.

Nia dehan, ezekusaun OJE 2019 ba kategória saláriu no vensimentu, bens servisu no transferénsia públika, la'o tuir rítmu ezekusaun nian. La'o ho di'ak.

“Agora, kapitál menór no kapitál dezenvolvimentu mak sei kiik, tanba projeitu fíziku ne'e ita hein progresu no kapitál menór ne'e tenke hein kompañia sira lori ona mai mak foin selu. Maibé, nia totál  ne'e mak % 60," hatete Sara Lobo Brites iha Parlamentu Nasional, Tersa (08/10/19).

Nia afirma, bainhira ezekusaun to'o iha dezembru, bele atinje ona pursentu boot.

"Ita sei haree too dezembru. Tanba, ita sei iha fulan tolu. Nune'e, to'o dezembru ezekusaun sei sa'e. Tanba, projetu barak mak sei selu iha tinan oin. Inklui, projetu 143 ne'ebé sai polémika no balun to'o agora seidauk selu. Tanba ne'e, afetadu ba ezekusaun kiik," dehan MF Sara Lobo.

Tempotimor (Dili) – Polítika Governu daualu ne'ebé promete atu kria kampu servisu ba Timoroan 60.000 kada tinan, ne'e bosok povu.

"Polítika kria kampu servisu 60.000 ne'e bosok. Ida ne'e bosok povu. Polítika kampaíña nian. La tuir realidade no laiha kálkulu ida atu ko'alia ba ida ne'e. Tanba ne'e, ita kuandu ko'alia tenke kálkulu halo didi'ak no halo estimasaun loloos mak ko'alia  ba públiku," dehan Vise Prezidente Bankada FRETILIN iha Parlamentu Nasionál, Kuarta (25/09/19).

Nia dehan,  polítika AMP nian ne'e hato'o iha kampaíña. Maibé, atu atinje kampu servisu 60.000 nee ita bosok povu no bosok an duni. Tanba, realidade imposivel bele atinje.

Antes ne'e, Vise I Prezidente Parlamentu Nasionál, Maria Angelina Sarmento deklara katak, bainhira Governu la konsege atinje, di'ak liu halo mudansa ba polítika Governu nian.

"Ha'u hanoin, se Governu hanoin polítika ne'e la'ós ideál, bazeia ba promesas kampaíña eleitorál, bele revé. Ha'u hanoin la sala buat ida. Importante, mak oinsá la'o tuir nafatin programa Governu nian. Kona-ba númeru ne'e ita bele halo mudansa, bazeia ba realidade ne'ebé mak andamentu polítika ne'ebé mak ita infrenta," dehan Vise I PPN ne'e loron Tersa (17/09/19).

Tempotimor (Dili) – Primeiru-Ministru Taur Matan Ruak lamenta no sente triste ho notísia kona-ba falesimentu eis-Prezidente Tribunál Rekursu (PTR), Dr. Guilhermino da Silva, ne’ebé hakotu nia iis iha loron 3 fulan Outubru tinan 2019.

"Ha’u lamenta no sente triste wainhira hatene katak eis-Prezidente Tribunál Rekursu husik ona mundu ida ne’e.  Dr. Guilhermino da Silva nu’udar ema ida ne’ebé ha’u koñese di’ak, ema ida ne’ebé haraik-an no dedika-an tomak ba dezenvolvimentu setor justisa nian. Wainhira ha’u sei Prezidente Repúblika, ami rua sempre hasoru malu beibeik iha Palásiu Prezidente hodi troka hanoin no ideias kona-ba setór justisa ita-nia nasaun nian.  Maibé labele kontinua nia mandatu to’o hotu tanba sofre moras i nia hato’o mai ha’u ninia pedidu rezignasaun i ha’u aseita, hodi nune’e nia bele foka nia-an tomak ba tratamentu saúde. Infelizmente, Maromak nia planu oin seluk, nia husik ona mundu ida ne’e," dehan PM Taur Matan Ruak bainhira rona notisia treste ne'e,  Sesta (04/10/19).

Ho espresaun fuan moras ne'e, PM lori governu daualu nian naran hato'o sentidu kondolénsia ba familia no familia justisa.

"Aproveita tempu susar ne’e, hodi  VIII Governu Konstitusionál nia naran no iha ha’u nia naran rasik, ha’u hakarak hato’o sentidus pézames no kondolénsias ba família enlutada i ita hotu harohan ba Na’i Maromak atu fó fatin rohan la’ek ba nia iha Reinu Laleha," tenik Taur Matan Ruak, Primeiru-Ministru. 

Eis Prezidente Tribunál Rekursu, Dr. Guilhermino da Silva simu pose hosi eis Prezidente Repúblika, atual Primeiru-Ministru Taur Matan Ruak iha loron 3  fulan Marsu  tinan 2014. Maibé, tanba kestaun saúde, iha loron 26 fulan Abril 2017, matebian hatama  nia pedidu rezignasaun no Prezidente Repúblika simu nia karta rezignasaun hodi nomeia filafali Dr. Deolindo dos Santos ba nia susesor.

Tempotimor (Dili) – Polísia Nasionál Timor-Leste (PNTL) Munisípiu Dili, durante fulan Agostu nia laran, rejista kazu infrasaun hamutuk 235.

Segundu Komandante PNTL Munisipiu Dili, Euclides Belo informa, kazu ne'ebé PNTL rejista barak liu mai husi kondusaun ema ne'ebé uza motorizada la uza kapasete.

"Kazu ne'ebé rejista durante fulan Agostu nian, barak liu mai husi kondusaun motorizada sira ne'ebé la uza kapasete no komete ona infrasaun. Ho nune'e, banhira selu ona multa sira bele foti filafali sira-nia motor," Euclides hatete.

Nia haktuir, motorizada ne'ebe prende iha fulan Agostu hamutuk 4, tanba laiha dokumentus. "Balu komprova ona dokumentus, hodi foti ona sira-nia motorizada. Maibé, balu la konsege foti. Motorizadas sira ne'ebé prende, balu laiha dokumentus no balu foti ona banhira sira multa no ba selu ona iha banku BNU," nia esplika.

Tempotimor (Dili) – Primeru Ministru, Taur Matan Ruak aprezenta proposta rezolusaun ne'ebé aprova husi Konsellu Ministru kona-ba renovasaun mandatu Membru Diresaun Arkivu no Muzeum Rezistensia Timorense (AMRT), tamba to'o ona tinan haat.

Tuir Ministru Estadu Prezidensia Konsellu Ministru, Agio Pereira katak, membru diresaun husi AMRT nomeadu husi Konsellu Ministru, kona-ba proposta husi Primeru Ministru durante rona husi Prezidente Repúblika ba mandatu tinan haat.

"Konsellu Ministru mós aprova rezolusaun ida kona-ba halo renovasaun membru AMRT ne'ebé lidera husi Hemart. Tanba sira nia mandatu tinan 4 ona, entaun iha fulan ida ne'e atu remata," dehan Agio Pereira iha Palásiu Governu, Kuarta (02/10/19).

Governante ne'e esplika, halo renovasaun ne'ebé Governu no Prezidente Repúblika halo balansu pozitivu husi traballu ne'ebé realiza husi membru atuais. Tanba ne'e, Governu deside atu renova fialafali mandatu husi Diresaun AMTR.

Tempotimor (Dili) – Hela de'it fulan ida, Sensus Agrikola remata. Entrevistadór sira iha munisípiu balun ne'ebé la'o tama sai uma, barak mak seidauk tau farda. Sira uza de'it kartaun ID.

“Sensu atu hotu ona, ami seidauk simu farda. Xefi dehan sei iha dalan hela,” hatete membru ekipa entrevistadór Sensus Agrikola nian iha Lospalos ba tempotimor.com, foin lalais ne'e.

Ba tempotimor.com, Tersa (10/09/19), Prezidente Komité Téknika Sensus Agrikula, Elias dos Santos Ferreira rekoñese. Nia dehan, kona-ba farda iha faillansu uitoan husi parte aprovizionamentu Ministériu Agrikultura no Peskas (MAP).

“Farda, kamizola, rompi no xapeu sei falta hela. Maibé, iha semana ida ne'e nia laran sei to'o hodi kobre ba munisípiu hotu-hotu. Maski nune'e, iha munisípiu balun hanesan iha Dili, simu ona farda. Tanba bainhira lansamentu membru balun hatais ona farda,” Elias hatete.

Prezidente Komité ne'e mós informa, ekipamentu ne'ebé prepara ba sensus agrikola ne'e barak. Maibé, MAP mak toma konta.

Hafoin de reuniaun Konsello dos Ministrus iha loron kuarta (11/09) iha palasiu Governu, tempotimor.com koko konfirma ho Ministru Agrikultura maibe ministru la fo komentariu ba midia sira.

Tempotimor (Dili) – Prezidente Komisaun D, Parlamentu Nasionál Virginia Ana Belo hakfodak ho lista asesor ne'ebé servisu ho VIII Governu, hamutuk ema na'in 1.014.

"Lista asesores ne'e ami simu husi Ministra Finansas. Iha lista ne'e, númeru asesor boot uitoan. Kuaze ema na'in 1.014. Ne'ebé, ami nia pensamentu kuandu númeru asesor barak, diak liu troka tiha funsaun públiku. Ita lalika servisu. Asesor sira mak servisu de'it," dehan deputada Virgina Ana Belo iha resintu Parlamentu Nasional, Kuarta (13/11/19).

Virginia promete, sei buka tempu par Governu ho PN ko'alia tok kona-ba asuntu ne'e. Tansá Governu presiza asesor barak hanesan ne'e.

Prezidente Komisaun D ne'e mós fó ezemplu kona-ba asesor ho númeru barak iha nasaun dezenvolvidu, hanesan iha Doha no Dubai. Nia hatete, kuandu tama iha sira nia instituisaun públiku, asesor rai nain %50 no estranjeiru %50. Mas, nia dehan, ida ne'e kestaun tanba nasaun ne'e osan barak.

"Ita Timor-Leste, ita-nia populasaun barak i ema barak. Nusa mak ita lakohi kapasita ita nia ema. Asesor husi estranjeiru de'it mak servisu, no fim ita nunka aprende buat ida. Parlamentu de’it nia asesor kuaze nain 10 hanesan ne'e de'it. Nusa mak Governu iha asesor barak hanesan ne'e? Asuntu ne'e ami sei ko'alia iha nivel Parlamentu no Governu," Virginia afirma.

Maski nune'e, nia rasik seidauk sura asesor sira ne'e tuir nia kategoria. Husi estranjeiru na'in hira nomos rai-laran na'in hira.

Virginia mós esklarese, saláriu ba asesor nasionál no internasionál iha diferensia. Tanba asesor nasionál kada fulan hetan $5000-7000 de'it. Maibé, asesor internasionál kada fulan hetan $10.000-20.000.

"Númeru asesor nasionál mak barak ne'e ha'u aseita, par bele subtitui. Maibé, sei asesor internasionál mak barak ha'u la aseita. Tanba ne'e, ha'u sei husu ba Governu par bele haree ba asuntu ne'e," Virginia tenik.

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com