Tempotimor (Dili)- Orsamentu Jeral Estadu tinan fiskal 2020 atu pasa iha Parlamemtu Nasional fila-fali ba vontade no konsensu Partidu koligasaun Aliansa Mudansa ba Progresu (AMP) nu'udar bloku maioria.

"Depende AMP, se AMP kontra, entaun kontra rame-rame, ne'ebé konforme sira, tanba ami opozisaun ne'e atu di'ak ka aat ne'e ami kontra hela de'it," dehan Deputadu PD, Adriano do Nascimento iha Uma Fukun PN, Segunda (6/1).

Deputadu ne'e akresenta, ba opozisaun kontra ne'e normal, maibé oinsa ho AMP sira apoiu malu ka lae, kuaandu laiha maka automatikamente OJE 2020 ne'e sei la pasa.

Orientasaun politika PD nian maka bainhira Governu la tau prioridade ba setor importante sira hanesan edukasaun, saúde, agrikultura, bee no Saneamentu maka sei vota kontra.

Tuir nia, atu dezenvolve nasaun no povu mak governu tenke dezenvolve setór importante ne'ebé liga direta ba povu nia moris.

Entretantu orsamentu jeral estadu (OJE) tinan fiskal 2020 ne'ebé governu submete fali ba PN iha loron 19 Dezembru 2019 ho total biliaun $1.668.

Tempotimor (Dili) - Situasaun politika kontinua lao estavel hafoin partidu koligasaun Aliansa Mudansa ba Progresu (AMP) vinga malu iha governasaun laran.

Tempotimor (Dili)- Deputadu Parlamentu Nasional (PN) kestiona kualidade edukasaun iha Timor-Leste.

Deputada Josefa Alves hatoo kestaun ne'e bainhira halo audiensia ho Ministra Edukasaun, Dulce de Jesus Soares, iha Parlamentu Nasional, Tersa (7/1).

Deputada ne'e kestiona tanba prosesu estudu no rezultadu ezame final hamosu duvida.

Nia fo ezemplu, Ensinu Tekniku Vokasional, prezensa alunu iha prosesu aprendijazen 85% efetividade maibe hafoin ano letivu alunu sira ne'e aprovadu 100%.

"Oinsa mak ne'e? Supervizaun husi Ministeiru Edukasaun lao ka lae? Loloos ensinu vokasional sira ne'e pratika mak barak, maibe realidade sira lao tun sae deit," dehan Josefa.*

Tempotimor (Dili) – Deputada Bankada KHUNTO iha Parlamentu Nasionál, Olinda Guterres hato'o  ninia kritika ba deputadu husi Bankada FRETILIN, ne'ebé hili posisaun pasivu iha votasaun ba proposta urjénsia governu nian kona-ba OJE 2020, Segunda (23/12/19) iha sesaun plenária.

"Ha'u hanoin kolega sira ne'ebé mak tuur muron hela ne'e, tempu ikus mai lalika vota sira. Ba kampaiña lalika vota tun sa'e. Lalika vota sira. Mai vota ba KHUNTO de'it ona. Mai tuur iha ne'e para simu osan futun boboot, depois lakohi ko'alia povu nia direitu," tenik Olinda.

Iha fatin hanesan, deputadu Luis Roberto mós fó hanoin katak bainhira deputadu sira iha plenária laran, tenke vota.

"Bainhira deputadu iha plenária laran, tenke vota. Maibé, deputadu balun tuur iha ne'e mais la vota. Ne'e, tanba saida? Ida ne'e mak dehan em nome povu nian? Ne'e polítika fo'er. Rejimentu hakerek momoos katak o atu vota kontra ka a favór ka abstensaun tenke vota. Maibé, balun tuur hela iha ne'e mós la vota.  Ne'e tanba saida? Ne'ebé ita keta lohi povu," afirma Luis.

Hatán ba deputadu husi bankada KHUNTO, deputadu bankada FRETILIN, José Pacheco dehan, nia la fó votu ba proposta urjénsia governu nian ne'e, tanba sei OJE 2020 ne'e nesesita ba povu nia moris duni, nusa mak retira tiha fali.

"Sei orsamentu ne'e nesesita duni ba povu nia moris, nusa mak retira tiha fali? Nusa mak bankada governu la defende orsamentu ne'e. Retira tiha, depois haruka mai fali. Urjente fali. Sei orsamentu ne'e importante ba povu, nusa la rezolve uza ida ne'e. Maibé, mai mak retira-retira de'it. Ne'ebé, ha'u la vota, tanba razaun ida ne'e. La'ós tanba ha'u laiha interese ba povu. Ne'e la'e," dehan Pacheco.

Tempotimor (Dili) – Deputadu Parlamentu Nasionál (PN) husu Ministru Defeza no Seguransa (MDS) Filomeno da Paixão de Jesus atu orienta parte Polísia Nasionál Timor-Leste (PNTL) no FALINTIL Forsa Defeza Timor-Leste (F-FDTL) atu asegura seguransa ba festa Natal.

"Husu ba Ministru Defeza no Seguransa atu tau seguransa iha Bekusi para bele asegura seguransa ba povu sira iha ne'ebá, tanba ita tama ona ba Natal. Ema hakarak hakmatek, maibé hodikalan ne'e ema la hakmatek tanba joven sira halo problema to'o dader," tenik deputada CNRT, Maria Rosa da Camara "Bisoi" iha plenária PN, Segunda (23/12/19).

Nia dehan, maske PNTL no F-FDTL to'o iha fatin, maibé liu de'it minutu balun, problema kontinua filafali to'o dader.

Iha fatin hanesan, deputada FRETILIN, Gabriela Alves afirma, seguransa la'ós iha fatin ne'ebá de'it (Bekusi). Maibé, seguransa ba Timor tomak iha festa Natal ne'e.

"Seguransa la'ós iha área ne'ebá de'it. Maibé ba timor tomak. Liuliu fatin ne'ebé mak indentifika iha risku ba konflitu," dehan Gabriela.

Hatán ba preokupasaun ne'e, Ministru Reforma Lejislativa Asuntu Parlamentar (MRLAP), Fidelis Manuel Leite Magalhães promete, sei hato'o preokupasaun ne'e ba parte relevante.

"Ba distintu deputadu no deputada sira nia preokupasaun kona-ba seguransa nian, orsida ami enkamiña kedas ba Ministru Defeza, para tau atensaun," afirma Fidelis.