Tempotimor (Dili) – Forum Organizasaun Naun Governamental (FONGTIL) predisaun, bainhira governu foti Orsamentu Jerál Estadu (OJE), liu husi Rendimentu Sustentável Estimativa (RSE), osan husi fundu mina rai sei hotu iha 2037.

"Ha'u hakarak haree, tansá Primeiru Ministru dada fila proposta OJE 2020. Kuandu iha Jornada Orsamentu, Ministra Finansas mai ho senariu tolu. Maibé, ita haree foti osan ne'e sees husi fali senariu ne'ebé aprezenta," informa Diretór Ezekutivu FONGTIL, Daniel Santos Carmo ba jornalista iha nia knaar Fatin, Kaikoli, Dili, Sesta (06/12/19).

Daniel esplika, senariu tolu tuir Ministra Finansas informa, ida mak foti orsamentu tuir Rendimentu Sustentável Estimativa, fundu petrolífeiru nian, segundu mak orsamentu billaun $1.3 no terseiru billaun $1.6.

"Kuandu foti ona osan husi fundu minarai liu billaun $1.6 ba leten ne'e, osan mina sei hotu iha tinan 2037," tenik nia.

Daniel relata, levantamentu ne'ebé governu agora halo ne'e, bele dehan katak, sees husi senariu tolu ne'e hotu. Tanba, governu foti kedas sae ba $1.95.

Kuandu governu halo levantamentu liu ona RSE, Daniel sujere, tenke halo justifikasaun, atu bele iha balansu investimentu no seitór produtivu.

"Ita haree iha proposta OJE 2020 ne'ebé retira ona husi parlamentu, osan ba Bens Servisu boot liu fali Kapital Dezenvolvimentu. Ida ne'e la garanti ba RSE fundu minarai," Daniel esplika.

Tempotimor (Dili) – Bankada FRETILIN iha Parlamentu Nasionál (PN) husu ba bankada Governu atu labele 'show force' ba proposta lei atividade petrolífeiru no lei fundu petrolífeiru ne'ebé hetan veto husi Prezidente Repúblika. Tanba, tuir bankada oposizaun ne'e, buat ida mak inkonstituisionalidade kontinua inkonstituisionalidade.

"Se ita hakarak show of power ne'e ita la'o. Maibé, ita la muda buat ida. Ida inkonstituisionalidade kontinua inkonstituisionalidade. Tanba la tuir buat ne'ebé mak tribunál hatudu nia konsekuénsia mak diploma ne'e sei la hetan promulgasaun," deklara Prezidente Bankada FRETILIN, Aniceto Guterres Lopes iha plenária PN, Tersa (08/10/19).

FRETILIN husu ba bankada Governu, atu halo reformulasaun ba diploma rua ne'ebé hetan julga husi Tribunál Rekursu no inkonstituisionalidade.

"Husu ba bankada Governu, mai ita hamutuk halo reformulasaun ba diploma sira ne'e, hanesan obrigasaun konstituisionál atu kumpri Konstituisaun RDTL no desizaun tribunal, nu'udar desizaun aas liu iha estadu Timor-Leste," dehan Aniceto Guterres.

Hatán ba deklarasaun ne'e, Prezidente Bankada CNRT Duarte Nunes katak, bankada Governu iha ona kondisaun ba halo reformulasaun ba diploma lei atividade petrolífeiru no lei fundu petrolífeiru.

Iha fatin hanesan, Bankada Partidu Libertasauan Povu (PLP), Maria Angelina Sarmento katak PLP prontu halo apresiasaun ba artigu ne'ebé mak ein kestaun.

"PLP Laiha objetivu show force. Maibé, oinsá mak show force be with dezenvolvimentu ba povu ida ne'e, atu lori dezenvolvimentu ne'ebé di'ak no sustentavel," dehan Maria.

Tempotimor (Dili) – Bankada Demokrátika iha Parlamentu Nasionál husu Governu atu konsidera amu João de Deus Pires, SDB nia partisipasaun ba luta libertasaun povu no nasaun Timor-Leste.

"Ita nia luta ne'e maka'as liután. La'o di'ak liután, bainhira igreja Katólika tama iha laran.  Hahú amu na'in rua, ne'ebé mak fasilita hanesan amu Afonso no amu Luis ne'ebé fasilita para Dom Martinho bele hasoru malu ho maun boot Kay Rala Xanana Gusmão iha liurai Miguel nia fatin iha Mehara," deklara Prezidente Bankada PD Mariano Assanami Sabino iha Plenária, Parlamentu Nasionál, Segunda (23/09/19).

Nia afirma, bainhira ita akordu ona katak igreja Katólika partisipa tomak iha luta libertasaun ne'e, maibé estadu iha de'it dalan úniku mak rejistu naran.

"Ita haree katak estadu iha de'it mak ema tau naran.  Entaun, ema balun husi igreja Katólika lakohi tau naran. Tanba nia sente nia kontribui, komite omenajem, Sekretáriu estadu veteranus, atu identifikasi sira duni. Partisipasaun maka'as liu iha funu ne'e mak amu João de Deus ne'ebé mak horseik laiha ona ita nia leet. Amu Locatelly ne'ebé oras ne'e sei moris. Inklui iha kongregasaun salezianu ne'ebé kontribui amu barak," Assanami afirma.

Tuir Assanami, estadu durante ne'e la rekoñese kontribuisaun husi amu sira nian iha situasaun defisíl nia laran.

"Estadu ne'e la rekoñese, la respeita no la melloria ba ninia ema ne'ebé mak involve. Dehan ema hotu tenke mai tau naran, só rejistu, se la rejistu prontu estadu mós haluha ona nia. Madre Guelhermina nomós amu barak ne'ebé mak katuas ona, ita halo saida? Governu mós tenke tau espesiál," dehan Assanami.

Assanami husu ukun na'in sira atu ukun estadu ne'e ho nakloke tanba estadu ne'e la'os partidu polítika nian, inklui Governu mós la'os partidu polítika nian. Nia dehan, ukun ne'e hanesan instrumentu ida para hetan konfiansa husi povu para ba kaer ukun.

Nia sujere fó fatin ba matebian Amu João de Deus Pires,SDB hodi haloot iha Jardín Dos Erois Metinaru.

Tempotimor (Dili) – Sekretariu Jeral G7+ Helder da Costa hatete, paz no estabilidade iha nasaun Timor-Leste agora la'o di'ak tebes no sai mós hanesan lisaun ida atu hanorin nasaun pos konflitu sira seluk.

"Lisaun boot ida, ita hanorin ba pais sira seluk mak ne'e, laiha ona konflitu no violénsia. Maski iha empase no inserteza polítika. Kuandu buat hirak hanesan ne'e mak mosu iha rai seluk, funu mosu ona. Tanba, situasaun sira ne'e ema komesa inpasensia azita tun sa'e. Mais, grasas a deus ita Timor la hanoin ona buat sira hanesan ne'e," esplika Sekretáriu Jerál G7+, Helder da Costa ba jornalista sira iha Palásiu Governu, Tersa (10/12/19).

Nia afirma, Timor-Leste agora unidade no paz. Tanba, iha lideransa ne'ebé forte no povu mós  maduru i kompriende ona prinsípiu demokrasia. Liuliu joven sira. Maski tentasaun oioin, maibé hakmatek ona. Ida ne'e, hanesan lisaun ba nasaun sira seluk.

Helder dehan, sidadaun hotu-hotu kompriende ona kona-ba demokrasia. Nune'e, mantein nafatin paz no estabilidade, hodi hala'o dezenvolvimentu.

Nia relata, iha situasaun polítika Timor nian, governu nafatin funsiona ho di'ak. Tanba ne'e, konsidera ita nia rai nafatin, paz no estabilidade. Helder espera, ba oin TL bele dezenvolve di'ak liután.

Tempotimor (Dili) – Ministériu Saúde (MS) liuhosi Sentru Nasionál Matan (SNM), durante tinan 2019, rejista ona pasiente sira ne'ebé hetan moras matan iha rai laran, hamutuk 10 mil. MS rekoñese, númeru ida ne'e aumenta aas.

"Por volta, tinan ida ne'e ami rejista kuaze dez mil. Tanba, ita haree Timor agora problema matan ne'e aumenta maka'as liután,"  informa Aptologistika husi Sentru Nasionál Matan (SNM), Dr. Marcelino Correia ba jornalista, iha atividade atu komemora loron mundiál ba matan, iha merkadu Taibessi, Kinta (10/10/19).

Espesialistamatan timoroan ne'e rekomenda ba komunidade sira atu halo prevensaun lalais ba moras matan ho hakbesik an ba iha Sentru Saúde  hirak ne'ebé besik. Ho nune'e bele hetan tratamentu husi doutór matan sira.

Kona-ba atividade iha merkadu Taibessi, tuir Marcelino, nia objetivu mak oinsá ho advokasia atu hakbesik an liután ba komunidade.

"Atu iha advokasia ba ita-nia saude, presiza hakbesik liután ba komunidade iha área ida ne'e, hodi bele hatene problema kona-ba sira nia matan," hatete Aptologistika ne'e.

Iha fatin hanesan, reprezentante Organizasaun Mundiál Saúde (WHO) iha Timor-Leste, Dr. Rajesh Pandav katak, WHO hakarak esforsu maka'as liután atu kombate ema defisiente sira ne'ebé ho problema matan.

"Ami kontempla no aprende kompromisu iha Timor-Leste atu esforsu, hodi kombate problema matan liuliu ba ema defisiente matan sira," Rajesh tenik.

Tempotimor (Dili) – Partidu FRETILIN iha Parlamentu Nasionál (PN) husu imediatu ba parte seguransa atu kaptura no halo investigasaun ba motorista deputadu nian iha PN, ne'ebé halo insultasaun ba Prezidente Repúblika.

"Uluk deputadu Sabino Soares ‘Guntur’ dehan Prezidente Repúblika goblok ba presta deklarasaun. Agora, motorista deputadu ida nian iha PN tau estatus katak, “Imi Fretilin 2000 ne'e, viva to'o rai ne'e ku'ak, mak imi nia Prezidente ka imi nia Doutór Lú Olo ema sei sulan hanesan fahi Makau to'o hotu," deklara deputada Maria Angelica iha plenária, Tersa (01/10/19).

Entertantu, deputadu Alexandrino Cardoso da Cruz mós hatete hanesan. "Motorista ida mak dehan fali sulan Prezidente Repúblika hanesan fahi Makau iha luhan laran to'o mate ne'e, ha'u hanoin ita konsidera ita nia prezidente hanesan animal," dehan Alexandrino.

Nia mós husu ba parte seguransa atu halo kapturasaun ba motorista ne'ebé insultu Prezidente Repúblika ne'e.

Tempotimor (Dili) – Tan de'it atu ba servisu iha Austrália, polítika Sekretáriu Estadu Formasaun Profisional no Empregu (SEFOPE), obriga inan-feto sira, ne'ebé tuir hela teste fisiku, tenke bomba rai.  

Observador Polítika husi Uiversidade Nasionál Timor Lorosa'e (UNTL), Camilio Ximenes Almeida lamenta ho hahalok ida ne'e.

"Teste fíziku atu ba Austrália mós haruka inan-feto sira bomba rai. Ita ne'ebé haree ida ne'e, triste. Matan ben monu. Tanba, teste hanesan ne'e so atu sai Polísia ou F-FDTL mak bele aplika," Camilio hatete ba tempotimor.com, iha Kampus tuan UNTL, Kaikoli, Dili, Kuarta (26/11/19).

"Hahalok ida haruka inan-feto sira bomba rai, tan de'it atu ba Austrália ne'e, presiza kombate. Tanba, hahalok ne'e invazor kolonál sira mak uluk halo ba Timoroan. Ita lakohi buat sira hanesan ne'e, mosu tan. Se lae, ita nafatin atan ba bei-beik," esplika Camilo.

Iha sorin seluk, tuir observadór polítika ne'e katak polítika Governu nian hodi haruka Timoroan sira sai ba liur ne'e, loloos la merese.

“Tan saida, Governu la kria polítika seluk hodi loke kampu servisu iha rai-laran. Ka polítika haruka de'it Timoroan sira ba Korreia no Austrália ne'e de'it mak loos ona?” Camilo afirma.    

Tempotimor (Dili) – Ministru Justisa (MJ), Manuel Cárceres da Costa prontu ‘fakar sai’ ema balun ne'ebé halo prátika mafia, ne'ebé prejudika Ministru Justisa mak sai Marino Interprise ninia ‘broker’.

"Ha'u sei buka mafia sira ne'e. Ha'u brani buka mafia sira ne'e, no ha'u hatene. Ha'u book husi Terras Propriedades no ha'u sei duni sai sira hotu. Ha'u la tauk ema ida. Tanba públiku hatene katak Ministru Justisa mak sai Marino Interprise ninia broker," dehan Ministru Justisa iha Ministeriu Finansas, Kinta (12/09/19).

Ministru afirma, nia la koñese Marino Interprise. "Ha'u la koñese se mak Marino Interprise. Marino Interprise sosa rai ne'e US$ 15.000. Kuandu nia sosa rai ne'e, ha'u sei Diretór Timor Telecom. Ha'u la presiza ninia US$ 15.000 ida. Ha'u nia osan agora ne'e para moris. Katuas to'o ona. Ha'u nia oan sira maestradu (S2) hotu ona. La'ós sai ministru mak eduka oan," afirma Ministru ne'e.

Ho lia fuan maka'as uitoan, ministru ne'e aprezenta nia patrimoniu privadu ba públiku. "Ha'u nia uma iha Dili uma di'ak. Ha'u nia uma iha Laclo, Manatutu uma di'ak-liu. Paling mewah mak ha'u nian. Ne'ebé, ha'u la presiza (sai) broker. Ha'u la presiza simu osan sogok. Ministru seluk karik? Mas, ministru ida Manuel ha'u la presiza. Tanba, ha'u nia feen ida ferik ne'e, lori ai-han  iha marmeta ba iha Bekora," nia esplika.

Tuir MJ, nia prontu atu fakar sai mafiozu sira ne'e. Nia dehan, nia hatene ona mafiozu sira ne'e. Tanba, nia iha dadus.

“Ha'u ko'alia tanba ha'u iha dadus. Ha'u la broker ba Marino Interprise. Ha'u la koñese  Marino Interprise. Ha'u ko'alia, tanba iha dokumentus notariadu nian hateten katak iha sosa no fa'an. Maibé, dokumentus ne'e mós ha'u agora analiza hela. Dokumentus ne'e, loos ka dokumentus siluman," MJ ne'e esplika.

Tuir Ministru, públiku fó sala ba MJ katak, MJ mak broker Marino Interprise. "Publiku agora hatene, Ministru Justisa mak sala, MJ sala ne'e buat hotu naksalak tiha ona. Ministru Justisa nunka. Ministru ida agora ne'e, la broker ema ida," nia tenik ho lian maka'as.

Defende An

Maski nune'e, molok eis Komandante em Xefi FALINTIL, Kay Rala Xanana Gusmão ‘revolta’ hasoru dezisaun tribunál no sobu lutu ne'ebé harii husi autoridade justisa no membru PNTL, hodi hale'u rai Marino Enterprise nian,  ba jornalista ho fiar an, Ministru Justisa deklara katak rai ne'e, Marino Enterprise nian.

“Rai ne'e Marino Enterprise nian. Rai ne'e Marino Enterprise sosa husi rai nain ida. Aktu ida sira halo sosa ho fa'an ne'e, legalizadu iha notariu,” deklara Manuel Cárceres da costa ba jornalista, loron hirak liubá, molok Xanana Gusmão sobu lutu iha Tersa (10/09/19).

Estudante universitariu ida, Marito da Costa ba tempotimor.com hatete, Ministru Justisa koko atu defende nia an hodi ameasa no akuza katak mosu prátika mafia iha Diresaun Nasionál Terras e Priopriedade (DNTP).

“Ohin Ministru Justisa hanesan ‘curhat’ fali ba média katak nia ne'e ema riku ida no la'ós Marino Interprise ninia broker. Mas, loron hirak liubá molok Xanana Gusmão ba sobu lutu iha Kaitehu, nia (MJ) dehan rai ne'e Marino Interprise ninian. Ida ne'ebé mak loos?” Marito husu.

Marito esklarese, públiku barak mak haree no rona bainhira Ministru Justisa halo intervista ho RTTL. “Se agora, Ministru Justisa defende an, oinsá ho ninia deklarasaun iha TV, ne'ebé ema edit no públiku fahe tutan tun sa'e iha handphone?” Marito dehan.  

Tempotimor (Díli) – Forum ONG Timor-Leste (FONGTIL) husu Governu atu tau atensaun no hadi'a infraestrutura iha área edukasaun, ne'ebé oras ne'e kontinua difikulta estudante sira nia prosesu aprendijazen.

"Tuir dadus ne'ebé iha, kona-ba estudante sira ne'ebé rejistu ba eskola  hamutuk porsentu 94. Signifika, númeru estudante aumenta boot. Entaun, liuhosi númeru estudante boot ne'e, Governu tenke haree ba infraestrutura kona-ba sala de aula, biblioteka, sala profesór nian, bee, hariis-fatin  no seluk tan," dehan Diretór Ezekutivu FONGTIL, Daniel Santos do Carmo iha Balide, Tersa (10/09/19).

Nia hatutan, Governu presiza haree ba edifisiu eskola, tanba maioria edifisiu eskola konstrui iha tempu Indonézia.

"To'o ukun an, ita hadi'a de'it. Kontribuisaun sira ne'e agora aat hotu. Entaun, agora ne'e ita presiza millioens US$ 30, para halo investimentu iha infraestrutura, hodi aumenta sala de aula ba estudante sira," nia haktuir.

Diretor ne'e mós hatete, eskola públiku sira iha territóriu tomak nia kondisaun la ideal, kompara ho eskola privadu sira.

"Eskola públiku hotu ne'ebé iha Timor laran tomak ne'e la ideal ona. Konstrusaun eskola ideal iha Timor ne'e so eskola privadu,” nia dehan tan.

Tuir Daniel, eskola públiku ne'ebé ideal tenke iha hariis-fatin, promove fase liman ho sabaun.  “Maibé, infraestrutura báziku hanesan bee-moos iha eskola laiha. Tanba, edukasaun ne'e la'ós hanorin ema para sai matenek de'it. Maibé, eduka mós ema iha aspetu hotu-hotu," nia haktuir.

Tempotimor (Dili) – Relasiona ho Timoroan sira-nia pasaporte ne'ebé mate iha estranjeiru, Ministériu Negósiu Estranjéiru no Kooperasaun (MNEK) servisu hamutuk ho Ministériu Justisa (MJ) forma ekipa levantamentu dadus nian ba rai liur, hodi identifika Timoroan sira ne'ebé pasaporte mate ona.

"Tinan oin, Ministériu Justisa (MJ) nia ekipa ba para haree pasaporte hirak ne'e. Tanba, ema na'in hira ita seidauk identifika. Nune'e, ita haruka uluk ekipa balun para halo levantamentu dadus," dehan MNEK, Dionísio Babo Soares iha Palásiu Governu, Kuarta (20/11/19).

Dionísio dehan, bainhira levantamentu dadus hotu ona, foin mak foti desizaun no entrega dadus hirak ne'e ba Ministériu Justisa. Liuliu ba diresaun ne'ebé toma konta ba pasaporte ninian. MNEK, tuir Babo, fasilita halo levantemantu dadus husi Timoroan sira iha Inglaterra, Irlandia no Portugál.

MNEK mós husu ba Timoroan sira iha Inglaterra, Irlandia no Portugál atu prepara an. Tanba, ekipa levantamentu dadus sei semana ida iha Inglaterra, depois ba fali Irlandia-norte no Portugál.

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com