“Ne'e hanesan eventu di’ak ba CNC tanba iha instituisaun tolu ne’e ida-idak iha ona nota entendemende ho Centru Nasional Chega ho intensaun ida atu reativa filafali Rede Nasionál Prevensaun Konflitu Komunitária”, dehan Diretór Ezekutivu CNC, Hugo Maria Fernandes, iha Salaun CNC, Balide, kuarta (23/02).
Hahú ho G7+ iha tinan 3 liuba selebrasaun nota entendementu iha Lisboa-Portugal, ho objetivu lori esperiénsia Timor nian ba prevensaun konflitu liuliu hari'i paz no rekonsiliasaun ba membru G7+.
Tanba ne’e hahú halo atividade balun husi iha tinan 2019 to’o agora sei kontinua la’o nafatin.
Ba Ministériu Interior assina nota entendimentu ida iha tinan 2021 ho intensaun rua mak hanesan primeiru servisu hamutuk ho SEPS liuhusi Diresaun DNPKK atu fó apoiu no kolaborasaun ba Prevensaun konflitu Komunitária iha nível komutária nian. No segundu sei dezenvolve termu referénsia ida ho Ministériu Interior kona-ba introdusaun ba materia formasaun nian iha akademia pólisia.
Nune’e mós ba ONG Belun, halo ona parseria ho sira iha tinan 2021, hafoin sira halo ona monitorizasaun ba konflitu iha nível komutária nian.
Tanba Rede Nasionál Prevensaun Konflitu Komunitária hari'i iha tinan 2008 hafoin mai to'o iha tinan 2015 paradu tiha hafoin kontinua filafali.
“Entaun hahú iha tinan 2015 ne'e ita la halo monitorizasaun no la funsiona iha tinan barak nia laran nune'e foin mak ita hahú reestabelese filafali”, dehan Diretór CNC.
Ho enkontru iha loron 23 fevereiru ne'e atu reativa filafali Rede Nasionál Prevensaun konflitu Komunitária, nune'e marka tan pasu ida ba parseria ne'ebé durante ne'e iha ona ho Ministériu Interiór, G7+ no ONG Belun.
“Inisiadór ba reativa filafali Rede Nasional Prevensaun konflitu Komunitária mai husi Sekretáriu Estadu Protesaun Sivíl iu husi Diresaun DNPKK depois CNC, G7+ no NGO Belun”, dehan nia,
Sekretária Jerál G7+, Helder da Costa hatete, envolvimentu G7+ ba Reativasaun Rede Nasionál Prevensaun Konflitu Komunitária ne'e, Bazeia parseria estratejiku entre instituisaun haat liuhusi SEPS, CNC nomós Belun.
“Dadaun ne'e, ita reativa fila fali Rede tamba ita atu hakat ba faze kampaña nomos eleisaun prezidensiál”, hatete nia.
Tanba normalmente iha kampaña politiku ne'e, ninia temperatura ne'e sa'e no pretagonista líder politiku iha kampaña ninia tendénsia ne'e bele insulta malu, hatun malu no minimiza malu.
Liuhusi asaun hirak ne'e, potensialmente bele mosu violénsia, tamba ne'e Rede ida ne'e, estabele hodi monitoriza hodi partilla informasaun ba komunidade labele envolve-an iha violénsia no fasilmente ba provoka sira.
Ho Timor-Leste nia naran ne’ebé morin iha nível internasionál, mak instituisaun haat hamutuk partilla informasaun katak Timor-Leste país ida ne'e hadomi paz, trankuilidade no dezenvolvimentu hatudu ba nasaun sira seluk.
“Ita tenke partilla informasaun hadomi paz, trankuilidade iha rai laran embora partidu politiku sira ba halo kampaña ita tur hakmatek no rona sira-nia programa se mak aban bainrua sai ita-nia prezidente”, afirma nia. (*)
