Sektetáriu Estadu Protesaun Sivíl (SEPS), Joaquin José Gusmão dos Reis Martins hatete, uma-kain hamutuk 90 mak evakua iha salaun Dom Bosco, tanba uma hetan estragu afeita husi udan boot ne'ebé akontese iha loron rua ba kotuk, nune'e rezulta mota Komoro tun hodi lori sira-nia hela fatin.

“Fofoun ita rejista iha 50 família, ho ema 205 pesoál, ne'e iha Domingu ne'e, dadaun ne'e evakua hotu ba Dom Bosco, mas hodi kalan nia númeru ne'e sa'e ba 90 família mak iha ne'eba, ho ema hamutuk 290”, informa Joaquin José Martins, iha edifísiu SEPS, Kaikoli, kuartu (23/02).

Maske nune'e, SEPS foka liuba ferik, katuas, labarik feto, no inan isin rua sira hodi bele fó asiaténsia ba sira ne’ebé presiza atu oinsá bele salva sira.

“Desde loron primeiru kedan ita fó asisténsia, hamutuk ho ita-nia parseiru sira, hamutuk ho autoridade lokál sira tuir SOP ne'ebé mak iha loron tolu bele fó hahán tasak, hanesan Matabisu, meiudia, no kalan, maibé se loron tolu ne'e mak sira seidauk fila ba sira-nia fatin, entaun ita fó hahán matak ba sira mak sira jere rasik”, dehan nia.

Nune'e SEPS mós kordena ho Ministériu Saúde hodi bele atende vítima sira ne'ebé mak dadaun ne'e evakua iha sentru evakuasaun Dom Bosco.

Enkuantu ekipa SEPS hahú ona halo avaliasaun ba uma sira ne'ebé hetan estragu hodi bele fó apoiu, maibé ho kondisaun sira labele halo fali uma iha fatin risku ba dezastre nian.

“Ita bele fó materiál tuir lei ne'ebé mak iha, maibé sira tenke buka fali ne'ebé mak la'ós fatin risku ba dezastre nian”, hatete nia.

Tanba ne’e, SEPS mós rejista númeru dezastre naturál ne'ebé akontese iha Munisípiu hanesan iha Ermera uma haat bee-sa'e, Manatutu uma-kain 12, iha RAEOA uma kain-tolu, no Bobonaro uma kain-haat, inkului ema na’in-rua mate.

Entreantu vítima, Adriano Maria de Jesus, iha Salaun Dom Bosco Comoro, kuarta (23/02) hatete, sira ne’ebé hela iha Dom Bosco hahú rejistu ona iha lista, tamba ekipa konjuntu husi protesaun sivil ho autoridade munisípiu halo inspesaun no verifika direita vítima sira-nia hela fatin hetan katak fatin ne'eba perigu duni sei evakua sira mai hotu iha ne'e.

Nune'e mós ba vítima ida ne'ebé mak uma bee tama no la estraga sira bele fila no ba sira ne'ebé nia uma aat ona kontinua hela hodi Governu bele rezolve. (*)