“Ohin ita halo vídeo konferénsia ho Diretór Rejionál UN Office ba Droga no Krime nian hodi halo diskusaun no rekomendasaun balu kona-ba prioridade Guvernu Timor-Leste nian ba prevensaun hodi kombate kriminalidade liliu haree ba kontra bandu no tráfiku umanu”, dehan Antonio Armindo, hafoin enkontru iha rezidente ofisiál ONU nia iha Kaikoli, tersa (22/02).

Antes ne’e asina ona akordu ho Organizasaun Internasionál ba Migrasaun (IOM) hodi reforsa jestaun fronteira ne’ebé hetan apoiu husi Guvernu Austrália liuhusi Departamentu Asuntu Interna

“Guvernu Austrália liuhusi Departamentu Home Affairs finansia IOM hodi apoiu Sistema Informasaun Jestaun Fronteira ida hanaran MIDAS hodi ajuda haforsa kapasidade jestaun fronteira no kontrolu migratóriu iha Timor-Leste no sistema ne’e la’ós atu halo de’it monitorizasaun ba movimentu ema tama no sai maibé mós atu deteta no impede ameasa inklui krime organizadu, terorizmu no tráfiku umanu”, esplika nia.

Tanba misaun prinsipal UNODC nian mak atu kontribui ba paz no seguransa globál, direitu umanus no dezenvolvimentu hodi halo mundu ida ne’ebé seguru kontra droga, krime, korrupsaun no terorizmu.

“Ita hatene UNODC globál no rejionál foka liuba droga no krime, entaun ida ne’e pasu importante ida atu komplementa servisu ne’ebé mak IOM no TLPDP halo daudaun ne’e hodi kolabora no haforsa di’ak liután servisu iha Timor-Leste liliu kapasidade membru PNTL-UPF, Servisu Migrasaun no Alfandega nune’e ba futuru Timor-Leste labele sai pontu movimentu merkaduria ilisitu ba Austrália no Nova Zelándia”, hatete nia.

UNODC mós sei komplementa servisu husi Polísia Federal Austrália ne’ebé lidera husi TLPDP iha área sira hanesan, avaliasaun ba krime organizadu transnasionál, intelijensia, jestaun fronteiras nomós dezenvolvimentu kapasidade iha área forensik no sibernetika. (*)