“Iha serimónia ne’ebé sei realiza tuku 10:00 oras timor-leste (otl), iha Palásiu Prezidensiál Nicolao Lobato, sei promove mós deviza Brigadeiru Jenerál Calisto dos Santos Coli ‘Coliati’ ba Majór-Janerál, enkuantu Komodoro Pedro Klamar Fuik mantein nafatin ho deviza atuál, ne’ebé permite ona nia atu asume kna’ar hanesan Xefe Estadu Maior Forsas Armadas”, dehan liuhusi Komunikadu Imprensa Kaza Sivíl Prezidente nian ne'ebé www.tempotimor.com asesu iha tersa (14/02).

Tuir Lei Defeza Nasionál Vise-Xefe Estadu-Maiór-Jenerál Forsas Armadas no Xefe Estadu-Maiór Forsas Armadas, nomeia husi Prezidente Repúblika tuir proposta Governu ne’ebé antes rona uluk Konsellu Superior Defeza Militar no Konsellu Superior Defeza Seguransa, liuhusi membru Governu ne’ebé iha kompeténsia ba matéria defeza.

Vise-Xefe Estadu-Maiór Jenerál Forsas Armadas foun, Brigadeiru Calisto Coli ‘Coliati’, ne’ebé moris iha Darulete, Likisá, tinan-62 liuba, antes ne’e asume kna’ar hanesan Xefe Estadu-Maior Forsas Armadas no iha mós esperiénsia nu’udar Adidu Defeza Timor-Leste iha Austrália, husi 2014 to’o 2018.

Enkuantu Komodoru Donaciano Costa Gomes ‘Pedro Klamar Fuik’, moris iha Hatulia, Ermera tinan-53 liuba, iha tinan-10 ikus, hala’o kna’ar nu’udar Diretór Institutu Defeza Nasionál Timor-Leste. Komodoru Pedro Klamar Fuik mós iha esperiénsia lidera Komponente Naval F-FDTL husi 2008 to’o 2011. (*)