Tanba kazu omesidu ne’ebé akontese iha área Tasitolu-Maslidun, ne’ebé nia kontinuasaun akontese iha loron segunda (01/02), bainhira Grupu ida lori mate isin husi Ospitál Nasionál Guido Valadares ba rezidénsia iha Masilidu, Tasitolu, Suku Komoro, Postu Administrativu Dom Aleixo, Munisípiu Dili, maibé akontese tuda malu entre Grupu Arte Marsiál ne’e tuir dalan iha Sidade Dili.

"Iha loron balun liu ba, dalaruma sai preokupasaun ida, ne'ebé depois ita halo atuasaun, pois bolu kedas líder sira husi arte marsiál ho arte rituál ninian, ne'ebé ita-boot sira akompaña ita orienta sira, ita aviza ona ba sira-nia membru para laiha tan atividade sira hanesan ne'e", dehan Komandate Jerál PNTL, Komisáriu Faustino da Costa, hafoin hasoru malu ho PR Lú Olo iha Palasíu Prezidensiál Bairopite, kinta (03/02).

Bainhira líder arte Marsiál sira la haree, atu membru sira ida-idak halo sira-nia jeitu hodi hamosu problema, PNTL sei rekomenda ba Governu la bele legaliza Arte marsiál sira ne’e.

"Ita bolu ona sira, ita ko'alia ona ba sira e sira aseita halo deklarasaun, pois sira rasik halo avizu ba sira-nia ema sira", hatete Komisáriu Faustino.

Deklarasaun ne’e asina husi líder Ikatan Kera Sakti (IKS) ho 77 (Arte ritual) ne'ebé sira mak halo iha presensa polisía nian atu sira kontrola sira-nia ema iha baze.

"Líder másimu tenke hakalma kontrola sira-nia ema sira ne'e, se sira la kontrola mak ami dehan ne'e, rekomenda Governu para la bele legaliza sira", deklara nia. (*)