"Sim, prioridade ne’ebé mak ohin ha’u ko’alia ona, ha’u laiha prioridade seluk tanba planu difine ona, programa difine ona no atividade difine ona, ha’u halo tuir de’it buat ne’ebé mak halo ne’e, ha’u la bele hasai buat ne'ebé ita-nia maun Lere halo”, dehan Tenente Jenerál Falur, iha Kuartel Jenerál Fatuhada, kuarta (02/02).
Relasiona ho kondisaun F-FDTL tanba situasaun krize barak mosu no depois pandemia Covid-19 mosu no buat sira ne’e hotu impede dezenvolvimentu iha instituisaun laran.
“Maibé kuandu livre no la’o ona entaun dezenvolvimentu forsa ninia la’o ona tanba ida ne’e mós prioridade ida, defeza ne’ebé externa interese estratejiku maka’as liu iha área ida ne’e”, dehan nia.
Maibé iha parte lojistika fiar katak Governu no Estadu komprometidu atu mellora kapasidade militar forsa armada ninian.
“Ohin ha’u ko’alia tiha ho Jeneral ami rua kleur hamutuk, ami rua hamutuk la’ós oituan, toba hamutuk la’ós oituan no hán hamutuk la’ós oituan no servisu hamutuk la’ós oituan maibé barak liu, nia husi legadu ne’e, hanesan amo, mai hanesan maun no hanesan komadante, mai hanesan líder no irmaun no kompaneiru, ida ne’e mak ninia karater nia hosik hela”, hatete Falur.
Tanba ne'e Tenente Jenerál Falur rasik deklara sei la haluha memoria ne’ebé Tenente Jenenrál Reformadu Lere nia kona-ba sofrementu sira durante hamutuk.
“Ha’u atu haluhan halo nusa, relasaun ami-nia ne’e kesi metin barak liu do que fahe, ami fahe mak família, fahe mak poder no politika maibé sofrementu barak mak ami hamutuk entaun la bele fahe, esperiénsia ne’e barak, tuir ninia krater no esperiénsia sai tiha ami-nia relasaun emosionál ne’e liu fali hanesan espritu kamardajen, irmaunidade, faternidade”, afirma nia. (*)