Print this page

PR Lú Olo Fó Omenajen ba Lere, Fiar Falur Sei Hatutan Asaun Militar

By February 02, 2022 751
Prezidente Repúblika (PR), Francisco Guterres 'Lú Olo' tula hela diviza Tenente Jenerál ba Falur Rate Laek. Prezidente Repúblika (PR), Francisco Guterres 'Lú Olo' tula hela diviza Tenente Jenerál ba Falur Rate Laek. Foto Suplay

Tempotimor (Dili)-Prezidente Repúblika (PR), Francisco Guterres 'Lú Olo' fó omenajen ba Tenente Jenerál Rmreformadu Lere Anan Timur ne'ebé remata ona nia kareira militar nian hodi fila ba sidadaun sivíl.

Maibé fiar Tenente-Jenerál Falur Rate Laek ne'ebé simu pose nu’udar Xefe Estadu-Maiór Jenerál FALINTIL-FDTL, sei hatutan asaun militar ho resposabilidade tomak.

"Ohin, iha forsa militár sira-nia oin, ha’u hakarak hato'o ho laran tomak ha'u-nia omenajen ba Timor-Leste nia Soldadu ida ne’ebé foin remata karreira militár ida ne’ebé naruk no furak tebes nu’udar Xefe Estadu-Maiór Jenerál FALINTIL-FDTL. Soldadu ne’e mak Tenente-Jenerál Lere Anan Timur", dehan PR Lú Olo iha nia diskursu ba loron transformasaun FALINTIL ba F-FDTL, dala-21, iha Kuartel jenerál Fatuhada, kuarta (02/02).

Tanba remata ona kna’ar tuir nia pedidu rasik, Prezidente Lú Olo hato’o rekoñesimentu ba servisu sira-ne’ebé mak presta ba Pátria no FALINTIL-FDTL durante ne’e, hodi sai ezemplu di’ak ida atu banati tuir no fó prestíjiu boot ba Timor-Leste.

"Señór Tenente-Jenerál Falur Rate Laek, iha momentu ne’e Señór Jenerál simu pose nu’udar Xefe Estadu-Maiór Jenerál FALINTIL-FDTL, ita-boot foti kna’ar aas liu iha ierarkia militár, hodi kaer responsabilidade aas liu iha nível komandu militár Forsas Armadas sira-nian no akonsellamentu militár ba órgaun soberania sira ho kompeténsia iha área Defeza no Seguransa Nasionál", afirma nia.

Kna’ar Xefe Estadu-Maiór Jenerál Forsa Armada nian hanesan dezafiu di’ak ida ba ofisiál ne’ebé de’it iha FALINTIL-FDTL, maibé mós dezafiu boot liu ida.

Maibé husi dezafiu boot hirak ne’ebé Jenerál sei hasoru durante ninia mandatu, Prezidente Lú Olo hakarak temi liuliu dezafiu atu haburas no hametin estrutura superiór komandu no kontrolu nian, formasaun, aprontamentu no sustentasaun ba forsa hodi halo sira sai fleksivel liután no prontu atu hatán ba dezafiu ne’ebé de’it.

"Ha’u fiar katak Señór Jenerál sei hatutan asaun komandu husi instituisaun militár ida-ne’ebé nia hakna’ar-an nu’udar Xefe Estadu-Maiór Jenerál. Maibé, atu halo nune'e, nia sei presiza ema hotu nia apoiu no kolaborasaun, liuliu husi sira-ne’ebé serbisu besik liu ho Xefe Estadu-Maiór Jenerál iha FALINTIL-FDTL no la kleur tan sei nomeia husi Prezidente Repúblika. Kolaboradór sira-ne’e mak Vise-Xefe Estadu-Maiór Jenerál, Xefe Estadu-Maiór FALINTIL-FDTL no Komandante sira Komponente nian", dehan Lú Olo. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items