Print this page

Aban, Promove Falur ba Fitun Tolu, Loron Ikus Lere Hatais Farda Militar 

By February 01, 2022 2168
Xefe Estadu-Maior-Jenerál Falintil-Forsa Defeza Timor-Leste (F-FDTL), Tenente Jenerál Reformadu Tito da Costa Cristovão ‘Lere Anan Timur’ ho Xefe Estadu-Maior-Jenerál F-FDTL Interinu, Major-Jenerál Domingos Raul ‘Falur Rate Laek’. Xefe Estadu-Maior-Jenerál Falintil-Forsa Defeza Timor-Leste (F-FDTL), Tenente Jenerál Reformadu Tito da Costa Cristovão ‘Lere Anan Timur’ ho Xefe Estadu-Maior-Jenerál F-FDTL Interinu, Major-Jenerál Domingos Raul ‘Falur Rate Laek’. Foto Espesial

Tempotimor (Dili)-Prezidente Repúblika (PR), Francisco Guterres ‘Lú Olo’, aban, kuarta (02/02) promove Major-Jenerál Domingos Raul ‘Falur Rate Laek’ ba (fitun tolu) postu Tenente-Jenerál no nomea Tenente Jenerál Falur Rate Laek ba kargu Xefe Estadu-Maior-Jenerál Falintil-Forsa Defeza Timor-Leste (F-FDTL).

Tanba ne’e, hanesan loron ikus ba Tenente Jenerál Tito da Costa Cristovão ‘Lere Anan Timur’ hatais farda militar hamri’ik iha kargu Xefe Estadu-Maior-Jenerál F-FDTL hodi hakat ba vida sivíl.

Haree ba ezonerasaun no promosaun ne’e, liuhusi Dekretu Prezidente Repúblika númeru 4/2022, 28 janeiru, 5/2022 no 6/2022, ezonera Tenente Jenerál Tito da Costa Cristovão ‘Lere Anan Timur’ husi kargu Xefe Estadu-Maior-Jenerál Lere Anan Timur, promove Major-Jenerál Domingos Raul ‘Falur Rate Laek’ ba postu Tenente-Jenerál no nomea Tenente Jenerál Falur Rate Laek ba kargu Xefe Estadu-Maior-Jenerál Forsas Armadas.

Ministru Defeza (MD), Filomeno da Paixao de Jesus, hatete, ho auzénsia Tenente Jenerál Lere Anan Timur nian, Prezidente Repúblika promove Vise Xefe Estadu Maiór hodi lidera instituisaun FALINTIL Forsa Defeza Timor-Leste (F-FDTL).

Nune'e iha loron 2 fulan-fevereiru sei halo promosaun ba Xefe Estadu Maior Jenerál Interinu, Major Jenerál Domingos Raul Falur Rate Laek, atu ba postu Tenente Jenerál.

“Sim, aban ita iha promosaun jerál ba señór Falur Rate Laek mak atu simu kargu foun hanesan Tenente Jenerál F-FDTL, hanesan ohin Jenerál Lere Anan Timur fó hatene ona, iha ne’ebá ita sei haree iha mós pasajen de kargu ba Jenerál ne’ebé mak foun”, informa Ministru Filomeno da Paixao de Jesus, hafoin partisipa graduasaun ba membru F-FDTL rekrutadu, iha Metinaro, segunda (31/01).

Promosaun ne’e, iha de’it Jerál ba Falur Rate Laek, kona-ba nia vise ne’e seidauk hatene, sei hein desizaun husi Prezidente Repúblika atu fó sai.  

Aleinde ne'e, Eis Xefe Estadu Maior Jenerál F-FDTL, Tenente Jenerál, Lere Anan Timur hatete, iha loron determinadu sei entrega ninia komandu ba komandu Jenerál Falur Rate Laek.

“Loron dala ikus, ha’u hatais sivíl ida ne’e, hamri’ik iha oin nu’udar Militár, judikamente aban ha’u sei hatais farda no tau ha’u-nia farda fitun tolu no tuir loloos ne’e fitun haat mais ema hothotu tuir lei no ita kumpre lei, ha’u sei entrega ha’u-nia komandu ba komandu foun, ba imi-nia aman no imi-nia pai Jenerál Falur Rate Laek”, deklara Lere iha Metinaru, segunda (31/01).

Maske, loron ikus hatais farda militar, la siknifika katak atu abandona ka husik instituisaun F-FDTL, maibé fó nafatin ninia kontribuisaun.

“Ha’u lori ha’u-nia fuan sorin ba servi fatin seluk, maibé ha’u-nia fuan sorin sei hela hamutuk ho imi nafatin”, afirma nia. 

Jenerál reformadu Lere hato'o obrigadu ba Governu ba Ministériu Defeza tanba bele fasilita ona Jenerál ninia estatutu sai nu’udar Jenerál reformadu atu ba kompete iha área polítiku ho ninia maluk polítiku sira seluk. 

Iha 21 janeiru 2022, Governu liuhusi reuniaun Konsellu Ministru deside prosesu ne’ebé mai husi desizaun reuniaun Konsellu Superior Defeza Militar hodi trata pedidu ezonerasaun Tenente-Jenerál Tito da Costa Cristovão Lere Anan Timur husi kargu Xefe Estadu-Maior Jenerál Forsas Armadas, promosaun no nomeasaun Xefe Estadu Maior Jenerál Forsas Armadas. 

Bazeia ba proposta husi Governu, iha 27 janeiru, Prezidente Repúblika rona hanoin sira husi Konsellu Superior Defeza no Seguransa  kona-ba ezonerasaun no nomeasaun, tuir artigu 86 alinea m) Konstituisaun Repúblika Demokrátika Timor-Leste dekreta ezonerasaun Tenente-Jenerál Lere Anan Timur husi nia kargu Xefe Estadu-Maior-Jenerál Forsas Armadas no nomea Tenente Jenerál Falur Rate Laek ba kargu Xefe Estadu-Maior-Jenerál.

Ezonerasaun ba kargu Xefe Estadu Maior Jenerál Forsas Armadas no bazeia ba prosedimentus no kondisaun sira defini kona-ba promosaun altas xefias militares tuir Novo Estatutos Militares das FALINTIL-Forças de Defesa de Timor-Leste (F-FDTL) no tuir desizaun Konsellu Ministru ba promosaun Major-Jenerál Domingos Raul Falur Rate Laek, Prezidente Repúblika promove Falur Rate Laek ne’ebé ezerse kargu nu’udar Vise-Xefe Estado-Maior-Jenerál ba Tenente-Jenerál.

Tuir Estatutu Foun Militares ejize katak kargu Xefe Estadu-Maior-Jenerál Forsas Armadas okupa husi ofisial jenerál ho postu tenente-jenerál ka vise-almirante.

Prezidente Repúblika, tuir proposta Governu nian no reuniaun Konsellu Superior Defeza no Seguransa, liuhusi Dekretu Prezidente Repúblika, nomea Tenente Jenerál Falur Rate Laek ba Xefe Estadu-Maior Jenerál Forsas Armadas.

Prezidente Repúblika, iha loron kinta (27/01), rona hanoin sira husi membru Konsellu Superior Defeza no Seguransa kona-ba desizaun Konsellu Ministru iha 21 janeiru nian relasiona ho ezonerasaun, promosaun no nomeasaun altas xefias militares.

Dekretu Prezidente Repúblika númeru 4/2022 kona-ba ezonerasaun Tenente-Jenerál Lere Anan Timur husi kargu Xefe Estadu-Maior-Jenerál, Dekretu Prezidente Repúblika númeru 5/2022 kona-ba promosaun Major-Jenerál Falur Rate Laek ba postu Tenente-Jenerál no Dekretu Prezidente Repúblika númeru 6/2022 kona-ba nomeasaun Tenente Jenerál Falur Rate Laek ba kargu Xefe Estadu-Maior-Jenerál tama iha vigor iha 28 janeiru 2022. (*)

Rate this item
(0 votes)
Last modified on Tuesday, 01 February 2022 11:14
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items