Print this page

Lere Husu Soldadu Rekrutadu F-FDTL Fó Vida ba Nasaun no Povu

By January 31, 2022 787
Eis Xefe Estadu maior Jenerál FALINTIL-Forsas Defesa Timor-Leste (F-FDTL), Tenente Jenerál Lere Anan Timur. Eis Xefe Estadu maior Jenerál FALINTIL-Forsas Defesa Timor-Leste (F-FDTL), Tenente Jenerál Lere Anan Timur. Foto Suplay

Tempotimor (Dili)-Eis Xefe Estadu maior Jenerál FALINTIL-Forsas Defesa Timor-Leste (F-FDTL), Tenente Jenerál Lere Anan Timur husu ba soldadu rekrutadu ne'ebé ohin, segunda (31/01) halo juramentu hodi sai lutu ba nasaun, atu fó sira-nia vida ba nasaun no Povu kuandu nesesáriu.

“Imi, ha'u-nia oan sira ne'ebé ohin halo juramentu, liafuan ida mak imi keta haluha katak, kuandu nesesáriu ha'u fo ha'u-nia vida ba ha'u-nia nasaun, ne'e labele haluha, úniku iha Timor Forsas Armada mak uza termu ida ne'e, siknifika nasaun nia vida boot liu o nia vida, entaun tenke fó o nia vida ba o nia nasaun no ba o nia povu”, dehan Eis Xefe Estadu, Lere, iha Metinaro, segunda (31/01).

Tanba ne’e, soldadu rekrutadu tenke hamrik metin hodi defende nasaun no povu bainhira ema atu sobu soberania Timor-Leste.

“Hanesan imi-nia inan aman gerileiru FALINTIL, ema rai seluk atu ukun Timor so liuhusi ami-nia mate, bainhira ami la mate, gerileiru ida de'it sei kokore nafatin, to’o ukun rasik-an, ohin loron FALINTIL transforma sai forsa defeza Timor-Leste ne'e mak ohin imi halo juramentu”, hatete Lere.

Maibé enkoraza nafatin soldadu rekrutadu sira, maske iha difikuldade, problema, obstakulu, labele tauk atu enfrenta, no brani nafatin nu'udar Forsas Armada ba oin.

“Timor ita-nia, forsa defeza ita-nia, imi mak na’in, imi mak na’in tanba imi ohin jura”, afirma nia.

Tanba ne'e, iha loron 31 fulan-janeiru 2022 soldadu rekrutadu sai ona Brasu armadu povu Timor-Leste nia

“Ha'u-nia parabéns ba imi hotu, ha'u-nia parabéns mós ba komandu sentru formasaun e treinu, bele halo esforsu hothotu, ohin loron imi sai militar lolos, sai lutu ba nasaun sei fakar imi-nia rán bainhira nesesáriu ba soberania Timor-Leste ninia”, hatete nia.

Ho ida ne’e, tenke hatudu nafatin disiplina, profesionál, neutralidade ne'ebé importante iha forsa armada nia laran. (*)

Rate this item
(0 votes)
Last modified on Monday, 31 January 2022 22:29
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items