“Horiseik komisaun B parlamentu konvida ha'u no Ministru Finansas ba aprezenta planu liuliu ba kampaña no eleisaun portantu iha PNTL ita prevé osan miliaun haat para antisipa iha ita-nian kampaña”, dehan Ministru Armindo, hafoin partisipa seremónia gradusaun ofisiál no inspektòr PNTL na’in-35 iha Sentru Formasaun Polisia (CFP,), Komoro, sesta (28/01)

Durante aprezenta planu Governu nian antisipasaun kampaña no eleisaun, oportunidade Ministériu Interior husu millaun ida ba sublimentu membru PNTL durante kampaña no eleisaun.

"Ami husu tan Ministériu finansas prevé millaun ida tan para bele ajuda sublementu fó ba membru PNTL sira ne'ebé ita koloka no ba mina sira ne'ebé mak ita aluga. Tanba ita transporte 45 hodi operasionalizasaun durante kampaña no eleisaun prezidensiàl", informa nia.

Viatura ne'ebé Governnu liuhusi Ministériu Interior kordena ho Komandu PNTL sei uza ba loron 30 durante períodu kampaña no eleisaun Prezidensiál.

"Ita-nia kampaña durante loron 15 de’it, maibé ita antisipa nafatin, sira uza to'o situasaun eleisaun ronde daruak", hatutan Governante ne'e.

Komandante PNTL, Komisáriu Faustino da Costa hatete, nesesariu duni ba PNTL atu aluga karreta hodi koresponde ba seguransa iha ámbitu eleisaun kampaña no eleisaun prezidensiàl.

"Ita iha dalan rua, ida mak prevé osan aluga karreta iha rentàl sira atubele fó membru PNTL sira hodi halo seguransa iha tempu kampaña no eleisaun dalan seluk mak karik karreta rental sira la sufisiente tenke buka karreta Estadu sira ne'ebé dadaun Governu deside  realoka iha edifísiu sira distribui ba membru sira bele uza apoiu seguransa iha kampaña no eleisaun", dehan nia.

Tanba sentru votasaun Governu aumenta atus-ida-resin-ida ne'e difikuldade PNTL atu halo seguransa, maibé PNTL nu’udar instituisaun Estadu sempe prontu atu hala’o servisu. (*)