Komandante UPF, Superintendente Euclides Belo hatete, sidadaun na’in-2 ne’e membru PNTL detein tanba halo transaksaun ilegál iha liña fronteira.

“Atu informa de’it ami-nia membru UPF halo operasaun no asegura motorizada ida marka Honda Revo fit, kór metan nia númeru matrikula L 2715 no detein joven mane na’in-1 ho naran inisiál BA, tinan 56 husi Salele, Aldeia Nikir, Suku Beiseuk, Postu Administrativu Tilomar ne’ebe hatama manu aman futu hamutuk 4. Enkuantu ida seluk nu'udar fasilitador ne’ebe fo apoiu hodi halo tranksaun ilegal iha fronteira”, dehan Euclides Belo liuhusi telefone, sábadu (22/01).

Bazeia ba informasaun ne’ebé rekolla katak manu aman hirak ne'e atu lori ba Salele iha Suku Maudemo, Postu Administrativu Tilomar.

“Tuir sasán na’in informa katak nia simu manu hirak ne'e dala rua iha liña fronteira We Hare área kontrola postu UPF Wala Lama iha loron primeiru 17 janeiru  2022 oras tuku 09:00 dader lori uluk manu aman 2 no iha 21 janeiru 2022 oras tuku 09.00 dader simu tan manu aman futu rua iha fatin ne'ebé hanesan no manu hirak ne'e atu lori ba Salele Suku Maudemo, Postu Administrativu Tilomar”, dehan nia. 

Entretantu sidadaun na’in-2 hamutuk ho evidénsia sira ne’e entrega ona ba Komandu PNTL Munisípiu Kovalima hodi kontinua ba prosesu investigasaun no sei prosesa tuir lei ne’ebé vigor iha nasaun Timor-Leste. (*)