“Indentifikadu katak mais 300 armas mak eziste iha Lospalos, e ita iha hotu ona dadus, naran se se, na'in se, ema ne'e hola husi ne'ebé, sa tinan nia rai buat ne'e, hanesan mós iha Ermera, Aileu hahú ona prosesu indentifikasaun oinsá atu kontinua asegura”, dehan Komandante Jerál Polisía, Nasionál Timor-Leste (PNTL), Komisáriu Faustino da Costa hafoin hasoru malu ho Prezidente Repúblika, Francisco Guterres ‘Lú Olo’, iha Palasíu Prezidensiál Bairopite, kinta (20/01).

Tanba liga ba lei n. 5/2017 konsidera arma branka ne'ebé sidadaun ruma rai no utiliza hodi kasa ba animál fuik ne’e krime.

Antes ne'e Komadante Komandu Operasaun Nasionál, Sperentidente Xefe Pedro Belo, husu ba komadante PNTL munisípiu sira hothotu atu kontrola no halo prensaun ba kilat anin, nune'e ema labele uza hodi hakanek ema seluk no kasa animál fuik.

“Orientasaun ne'e hasai dala ida hotu ona no nia kontinuasaun la'o nafatin hodi rekolla kilat manu ne'e, inklui detein sidadaun ne'ebé uza armas ne'e, tanba ita hotu hatene lei númeru 5/2017 kona-ba arma branka ne'e bandu, ema atu uza sasán sira ne'e", dehan Pedro Belo, iha Kaikoli, kinta (13/01).

Nune'e komandu Polísia Nasionál Timor-Leste (PNTL) fó ona instrusaun ba komandu munisípiu hotu hodi halo operasaun liliu halo prensaun no detensaun ba komunidade ne'ebé uza kilat anin.

“Husu halo kedas aprensaun no detensaun ba ema ne'ebé uza no kaer kilat manu ne'e hodi kordena direita ho ministériu públiku atu prosesa tuir lei", hatete nia. (*)