“Lere iha direitu hato'o nia karta reforma ida ne'e, tanba tuir estatutu militár nia, ko'alia ida ne'e, katak militár sira ne'ebé idade pasa ona ba 60 sira bele ba reforma, tanba ne'e mak reforma ida ne'e garante estatutu militár, nia mós serbí institutuisaun ne'e tinan barak ona”, dehan Diretór Interinu, Sancho Xavier, iha nia kna’ar fatin, Bairu Sentrál, kinta (20/01).

Tanba Tenente Jenerál Lere serbí ona Institutuisaun militár iha tinan 20-resin ona, nune'e nia hatama karta reforma ka husu rezignasaun ne'e nu'udar direitu ida.

Maibé exeptu ba sira ne'ebé asume kargu hanesan, Xefe Estadu Maior Jenerál F-FDTL, Vise Xefe Estadu Maior Jenerál Forsa Armada sira ne'e iha eksesaun sira bele ba reforma ka asume nafatin kargu.

“Tanba ne'e mak Lere husu reforma, e ita hotu hatene nia intensaun atu kandidata-an ba Prezidente Repúblika, ne'ebé reforma ne'e prosesu normál, ne'ebé la'o tuir estatutu militár nia”, hatete nia.

Ba prosesu reforma tenke liuhusi Ministériu Defeza, hafoin Governu bele halo diskusaun ho Prezidente ka sira seluk para hola desizaun.

Maibé liga ho intensaun Lere atu kandidata-an ba Prezidente Repúblika ne'e akontese mós iha tempu liuba.

“Sempre uza dalan rezignasaun, tanba sa mak uza dalan rezignasaun, tanba militár sira labele ko'alia polítika bainhira sira sei asume kargu hanesan militár no sei uza atributu militár, ita bele haree iha Konstituisaun Repúblika Demokratika Timor-Leste (KRDTL) artigu 146 númeru 3, katak militár sira labele iha partidu ou militár sira labele mete polítika, nune'e mós iha defeza nasionál artigu 63, ko'alia mós kona-ba ida ne'e”, esplika nia.

Bainhira asume nafatin kargu hanesan militár halo deklarasaun ho karater polítika ne'e hanesan kria presedente ne'ebé la di'ak iha futuru, liuliu iha Institutuisaun militár, tanba jerasaun foun sira mós bele tuir fali saida mak halo agora ne’e. (*)