“Kuaze iha Munisípiu hotu hasoru armorio sira ne'e hanesan, tanba sira-nia fatin kloot, balun sei junta hamutuk ho admistrasaun nia”, dehan Inspetór Gabinete Inspesaun PNTL, Superintendente Xefe Carlos Jerónimo, iha edifísiu Inspesaun Jerál Estadu, Lesidere, kuarta (19/01).

Nune'e kada munísipiu presiza armorio ida ho ne’ebé di'ak atubele asegura kilat hotu iha laran.

Tanba iha inspesaun ne'e konsege deteta lakunas balun, maibé iha lakunas balun konsege rezolve kedan, no balun tenke aprezenta ba komandu jerál hodi foti solusaun. 

"Ita presiza duni fatin balun que ita bele tau, hodi nune'e prezerva material sira ne'e, maibé espera buat sira ne'e hotu ita hasa’e ba komandu depois komandu mak hatene oinsá haree ba ida ne'e, hodi solusiona”, afirma nia.

Kona-ba utilizasaun kilat, iha membru barak mak uza tuir regra, maibé iha ida rua mak la tuir regra, nune'e iha inspesaun kontinua fó hatene ba komandante sira hodi halo monitorizasaun ba uzu arma. 

Komandante PNTL Munisípiu Dili, Superintendente Xefe Henrique da Costa hatete, hafoin simu karta husi Komandante Jerál PNTL, Komisáriu Faustino da Costa, orienta kedas ba eskuadra sira, nomós ba seksaun relevante sira prepara dadus, no informasaun hodi fornese dadus ne'ebé mak loos tuir duni pedidu husi ekipa traballu nian.

Tanba ne’e, ekipa Komandu Jerál PNTL sei halo inspesaun ba eskuadra neen iha Munisípiu Dili, no administrasaun liliu ba armoriu nian, inklui mós seksaun sira. 

Ba armoriu iha PNTL Munisípiu Dili kondisaun di'ak, tanba iha tinan ida ba kotuk hetan apoiu husi parseiru sira hodi konstrui armoriu ba fatin armas nian. (*)